Валерый Кавалеўскі: Галоўнае пытанне, якое тут абмяркоўваем, – гэта пагроза незалежнасці Беларусі
Госць Рацыі – намеснік кіраўніка аб'яднанага пераходнага кабінета, адказны за міжнародныя справы – Валерый Кавалеўскі, які зараз знаходзіцца ў Вашынгтоне.
Artykuł Валерый Кавалеўскі: Галоўнае пытанне, якое тут абмяркоўваем, – гэта пагроза незалежнасці Беларусі pochodzi z serwisu БЕЛАРУСКАЕ РАДЫЁ РАЦЫЯ.
Госць Рацыі – намеснік кіраўніка аб’яднанага пераходнага кабінета, адказны за міжнародныя справы – Валерый Кавалеўскі.
РР: Ведаем, што Вы зараз знаходзіцеся ў Вашынгтоне. Вашынгтонская павестка – давайце з гэтага пачнём нашу размову. Якія сустрэчы, якія пытанні вырашаюцца?
Валерый Кавалеўскі: Самае галоўнае пытанне, якое тут абмяркоўваецца, – гэта пагроза незалежнасці Беларусі. І насамрэч гэта ў пэўным сэнсе сімвалічна, што ў свята 9 траўня, у свята Перамогі над нямецкім нацызмам, мы праводзім у гутарках пра тое, што Беларусь на сённяшні дзень знаходзіцца пад пагрозай менавіта ў выніку агрэсіўных дзеянняў самой Расеі, якая ў той час была нашым саюзнікам у барацьбе за свабоду. Тыя пытанні, якія мы будзем абмяркоўваць, гэта пашыраная канкрэтная прысутнасць Расеі на тэрыторыі Беларусі, бескантрольная, фактычна беларускае грамадства ў гэтым працэсе не ўдзельнічае; выкарыстанне беларускай інфаструктуры, паветранай прасторы, тэрыторыі, для таго, каб атакаваць Украіну, ці аказваць псіхалагічны ціск на Украіну; гэта і размяшчэнне ядзернай зброі на тэрыторыі Беларусі, таксама вельмі небяспечная сітуацыя. Мы ведаем, расейцы, калі яны пашыраюць сваю ваенную прысутнасць у іншых краінах, яны ёй карыстаюцца для таго, каб забяспечваць свае інтарэсы, а ў некаторых выпадках, як гэта было ў Крыме, мы бачылі нават анексію цэлай тэрыторыі, цэлай паўвыспы, і мы, канешне, не можам глядзець на развіццё расейскай прысутнасці на тэрыторыі Беларусі пад іншым вуглом, акрамя як такога, што расейцы могуць скарыстацца супраць нас і мы павінны ў гэтым сэнсе мабілізаваць міжнародную супольнасць дзеля таго, каб спыніць гэтае прасоўванне, спыніць развіццё ваеннай структуры ў Беларусі і спыніць размяшчэнне ядзернай зброі на нашай тэрыторыі. Акрамя таго нагадаю, што ў сакавіку, калі Святлана Ціханоўская наведвала Вашынгтон, была дасягнутая дамоўленасць пра тое, што будзе створаны механізм стратэгічнага дыялогу паміж Злучанымі Штатамі і дэмакратычнай Беларуссю. І зараз гэтая павестка будзе скарыстаная менавіта для таго, каб прапрацаваць, дамовіцца пра асноўныя контуры і канцэпцыю гэтага стратэгічнага дыялогу. Гэта фактычна інстытуталізацыя нашых адносінаў. Гэта будзе магчымасць зрабіць нашу працу над двухбаковымі адносінамі сістэмнай, каб яна была практычнай, каб яна была арганізаваная, скардынаваная ўсімі бакамі.
РР: Ці можаце агучыць нейкія пункты сваёй павесткі?
Валерый Кавалеўскі: Гэта будзе цэлы шэраг сустрэч у дзяржаўным дэпартаменце, менавіта па пытанню стратэгічнага дыялогу. Мы таксама абмяркоўваем санкцыі. Мы абмяркоўваем ціск і адказнасць Лукашэнкі і рэжыму за злачынствы ў самой Беларусі і ўдзел у ваенных злачынствах на тэрыторыі Украіны, асабліва на першапачатковым этапе. Таму тут даволі багатая паветка дня будзе. Таксама будзе цэлы шэраг сустрэч у Кангрэсе Злучаных Штатаў, бо там таксама актыўна ўдзельнічаюць у выпрацоўцы адносінаў з Беларуссю. Праводзім брыфінгі, расказваем пра тое, што адбываецца ў Беларусі, якія могуць быць наступствы і што Злучаныя Штаты змогуць зрабіць дзеля таго, каб спыніць сітуацыю ад негатыўнага сцэнарыя. Таксама будуць сустрэчы ў Пентагоне, у Міністэрстве абароны Злучаных Штатаў. Ну і таксама ў іншых дзяржаўных органах. Таксама магчыма ў Радзе нацыянальнай бяспекі Злучаных Штатаў.
Цалкам размова:
Размаўляў Улад Грынеўскі, Беларускае Радыё Рацыя.
Artykuł Валерый Кавалеўскі: Галоўнае пытанне, якое тут абмяркоўваем, – гэта пагроза незалежнасці Беларусі pochodzi z serwisu БЕЛАРУСКАЕ РАДЫЁ РАЦЫЯ.