Аліна Коўшык: Мы павінны хацець, каб нашы дзеці вывучалі беларускую мову
"Госця Рацыі" - Аліна Коўшык, прадстаўніца па нацыянальным адраджэнні ў Аб'яднаным пераходным кабінеце Беларусі.
Artykuł Аліна Коўшык: Мы павінны хацець, каб нашы дзеці вывучалі беларускую мову pochodzi z serwisu БЕЛАРУСКАЕ РАДЫЁ РАЦЫЯ.
„Госця Рацыі” – Аліна Коўшык, прадстаўніца па нацыянальным адраджэнні ў Аб’яднаным пераходным кабінеце Беларусі.
РР: Распавядзіце пра вашу паездку ў Гайнаўку. Ці варта было паехаць?
– Сапраўды, варта было паехаць. Я раней была ў Гайнаўцы, але ніколі не была ў ліцэі. Цяпер Гайнаўскі ліцэй фактычна змагаецца за сваё існаванне, за захаванне сваёй беларускай душы, сваёй беларускай тоеснасці. Мы ведаем, што спрабуюць зрабіць беларускую мову неабавязковай для вывучэння ў гэтым ліцэі. Але дырэкцыя школы, настаўнікі, бацькоўская рада і вучні за захаванне беларускасці гэтага ліцэю. Было вельмі прыемна пабачыць у ліцэі „Пагоню”, партрэты Коласа, Багдановіча. Было прыемна, што дзеці віталіся з намі па-беларуску. Сапраўды, адчуванне такое вельмі сяброўскай, цёплай атмасферы ў гэтым месцы ёсць. Я думаю, што дзякуючы яму захоўваецца і гэтая беларуская меншасць у Гайнаўцы, адчуванне сябе беларусамі для таго маладога пакалення, якое зараз вырастае.
РР: Як можна пазмагацца за беларускую мову? Хто можа быць нашым саюзнікам?
– Я думаю, што перадусім нашымі саюзнікамі павінны быць мы. Мы павінны хацець, каб нашыя дзеці вывучалі беларускую мову, або жыхары гэтых мясцовасцяў, бацькі. Гэта для нас павінна быць важна. Мы павінны ўзяць голас у гэтай дыскусіі. Палітычна мы робім усё, што магчыма дзеля таго, каб дапамагчы гэтай справе. Прадстаўнікі ліцэяў і беларускай меншасці сустракаліся ў Варшаве з прадстаўнікамі Канцылярыі Прэзідэнта Рэспублікі Польшча. Была добрая сустрэча, яна была вельмі канкрэтная, чакаем далей. У нас будзе сустрэча з Міністэрствам адукацыі праз два тыдні. Чакаем сустрэчы. Будзем спрабаваць задзейнічаць нашых польскіх сяброў дзеля таго, каб пераканаць навошта беларуская мова ў гэтых ліцэях і чаму. Калі мы пазбавім статусу абавязковай беларускай мовы, гэта будзе проста падарунак для дыктатара Лукашэнкі, які скажа: „Глядзіце, вы тут хочаце беларускую мову, а нават у Польшчы яна нікому не патрэбная”. І, напэўна, гэта выкарыстае прапаганда.
Беларускае Радыё Рацыя
Artykuł Аліна Коўшык: Мы павінны хацець, каб нашы дзеці вывучалі беларускую мову pochodzi z serwisu БЕЛАРУСКАЕ РАДЫЁ РАЦЫЯ.