Галіна Астапавец: У траўні адбылося 18 паветраных атак на Кіеў
Госця Рацыя - украінская журналістка Галіна Астапавец, якая распавядае пра сённяшняе жыццё ў Кіеве.
Artykuł Галіна Астапавец: У траўні адбылося 18 паветраных атак на Кіеў pochodzi z serwisu БЕЛАРУСКАЕ РАДЫЁ РАЦЫЯ.
На Кіеў ляцелі дроны, а потым ракеты. Такую тактыку выкарыстоўваюць войскі агрэсара. Гэта ведаюць ужо нават дзеці. Кажа наша госця – украінская журналістка Галіна Астапавец. Расея тройчы за апошнія суткі атакавала Кіеў.
Пасля камбінаванай і балістычнай атакі мінулай ноччу прымяняліся выключна беспілотнікі. У паветранай прасторы Кіева сілы супрацьпаветранай абароны збілі больш за 20 цэляў.
Улад Грынеўскі распытаў Галіну Астапавец з Кіева пра некалькі апошніх дзён, калі актывізаваліся расейскія атакі.
РР: Гаворым пра такую канкрэтную статыстыку. За травень, за апошнія 30 дзён, расейцы 18 разоў «лупілі» па Кіеву.
Галіну Астапавец: Так, ужо 18 атак адбылося па Кіеву за апошнія 30 дзён. Як раз сёння яны зноў ударылі іранскімі дронамі, ёсць разбурэнні, пакуль не зразумела, ці гэта дрон, ці яго кавалкі, але трапіла ў жылы дом, загінула жанчына 33 гадоў. Такі канкрэтны тэрарызм. За апошнія 5 дзён атакі па Кіеву ідуць кожную ноч. А ўчора яны дадалі крыху нечаканасці, сюрпрызу, расейцы яшчэ ўдарылі балістычнымі ракетамі. Я нагадаю, што ёсць істотная розніца паміж крылатымі і балістычнымі ракетамі. Балістыка прылятае за 2 мінуты з часу пуску. Таму тут такое тварылася, проста нейкі армагедон. Але адбіліся. На шчасце, было без руйнаванняў, без ахвяраў. Не ведаю, ці бачылі вы ў інтэрнеце ролік, на якім паказана, як ракета цудам не трапіла ў маршрутку. Проста нейки цуд, што ніхто не пацярпеў.
РР: А як для цябе гэтая ноч прайшла? Як гэта сёння адбываецца ў Кіеве? Ёсць гэты страх? Ці дома сядзелі, ці беглі ў метро?
Галіну Астапавец: Так, сапраўды многія хаваюцца ў метро. Мне да метро ехаць далекавата. Яшчэ які-небудзь дрон заб’е па дарозе пакуль даеду. Час ад часу мы спускаемся ў паркінг. Але сёння гэта было нечакана. Ужо чарговая ноч без сну. Калі пачаліся выбухі, то мы проста забеглі ў ванны пакой. Ёсць такое правіла двух сценаў. Гадзіны дзве мы там прасядзелі. Але дакладна ўжо не памятаю, бо ўсё ў нас пераблыталася. Яшчэ я палічыла, што па Кіеву за гэты месяц было выпушчана каля 160 ракет і каля 350 ударных іранскіх дронаў. Таму можна сабе ўявіць маштабы такіх атак.
РР: Гэтыя лічбы ці сведчаць, што добра працуе ўкраінская супрацьпаветраная абарона?
Галіну Астапавец: Сапраўды ўкраінская супрацьпаветраная абарона паказвае выдатныя вынікі. Нагадаю, што былі атакі балістычнымі і гіпергукавымі ракетамі. Адразу адначасова прыляцела 16 штук. Мы гэта ўсё чулі. Гэта было 12 мінут жорсткага паветранага бою. Былі хвіліны, калі я думала, што гэта ўсё. Але адбіліся. Сапраўды СПА ў нас сёння на вельмі высокім узроўні. Мэр Кіеве Клічко сказаў, што Кіеў на сёння ахоўвае найлепшыя сістэмы СПА ў свеце.
Цалкам размова:
Пра сітуацыю ў Кіеве расказала наша калега, украінская журналістка Галіна Астапавец. У выніку падзення абломкаў у розных раёнах горада ёсць разбурэнні, пажары, а таксама пацярпелыя і як мінімум адна жанчына загінула.
Размаўляў Улад Грынеўскі, Беларускае Радыё Рацыя
Artykuł Галіна Астапавец: У траўні адбылося 18 паветраных атак на Кіеў pochodzi z serwisu БЕЛАРУСКАЕ РАДЫЁ РАЦЫЯ.