Алена Маслюкова: Людзі знаходзяцца пад пастаянным ціскам
"Госця Рацыі" супрацоўніца праваабарончага цэнтра "Вясна" Алена Маслюкова.
Artykuł Алена Маслюкова: Людзі знаходзяцца пад пастаянным ціскам pochodzi z serwisu БЕЛАРУСКАЕ РАДЫЁ РАЦЫЯ.
Пытанне вызвалення палітвязняў стаіць для дэмакратычнай грамадскасці на першым месцы. Людзей у вязніцах жорстка катуюць, рэпрэсіі не спыняюцца ні на дзень.
Пра гэта мы паразмаўлялі з „Госцяй Рацыі” праваабаронцай „Вясны” Аленай Маслюковай:
РР: На што цяпер палююць праваахоўныя органы? Што яны шукаюць? За што затрымліваюць? Ці неяк перасцерагаюць праваабаронцы актыўных людзей?
– Сітуацыя ў Гомельскай вобласці вельмі цяжкая з правамі чалавека. Назіраючы за тым, што адбываецца сёння на Гомельшчыне, магу сказаць, што да прыкладу ў траўні было прыцягнута 95 чалавек. Гэта толькі па адміністрацыйных артыкулах 19.11 КаАП РБ. То бок гэта гаворыць пра тое, што ў людзей былі падпіскі на так званыя экстрэмісцкія каналы, прынамсі на тыя рэсурсы, якія ўлады штодня прызнаюць экстрэмісцкімі. Сёння жыць у Беларусі вельмі небяспечна, бо ўся Беларусь пераўтварылася ў аднаго такога вялікага, суцэльнага экстрэміста. Трое з гэтых прыцягнутых да адказнасці, ужо маюць крымінальныя артыкулы. На волю яны не выйшлі, яны знаходзяцца ў СІЗА №3. Пра 16 нам яшчэ невядома. Магу сказаць, што зараз пачаліся працэсы над людзьмі па цяжкіх артыкулах, нам абсалютна незразумелых, мы толькі сутыкаемся з імі – гэта 358-1, гэта так званая агентурная дзейнасць. Разумееце, што само за сябе гаворыць гэтая назва і гэты артыкул. Таксама прыцягваюцца да адказнасці, зараз адбываецца ў Гомельскім абласным судзе разгляд справы па 290-5 артыкуле, гэта стварэнне так званай тэрарыстычнай арганізацыі. Магу сказаць, што аналагічны працэс вядзецца таксама ў Менску ў адносінах да 21-гадовага хлопца. На жаль мы гэтыя справы вывучыць не можам, бо яны праходзяць у закрытым рэжыме. Гэта такая звычайная практыка сёння ў „судовай” сістэме Беларусі. Суды не празрыстыя. Магу сказаць, што з чатырнаццаці працэсаў, якія адбыліся на Гомельшчыне ў траўні, пяць былі закрытымі. Дзевяць чалавек прыцягнутыя да крымінальнай адказнасці па два, па тры і нават па пяць артыкулаў ставяць у віну гэтым людзям. 6-га чэрвеня ў мяне ў раскладзе ўжо стаіць дзевяць крымінальных працэсаў. Пра два прысуды мы ўжо даведаліся. То бок сітуацыя, як вы разумееце, не паляпшаецца, яна практычна крытычная. Сапраўды гэты прыгнёт, гэты ціск, гэтае запалохванне з боку ўладаў, не дае нармальна жыць людзям. Людзі знаходзяцца пад пастаянным ціскам, пад пастаянным прэсінгам, пад пастаянным адчуваннем нейкай віны, хаця ніякай віны ў людзей і няма. За тое, што яны жывуць, цікавяцца чымсьці, нешта чытаюць, спрабуюць знайсці альтэрнатыўныя думкі, меркаванні, выказванні. То бок людзі павінны жыць пастаянна азіраючыся. Улады пераўтварыліся ў нейкага такога „Левіяфана”, якому пастаянна патрэбна нечым харчавацца. Іх умоўна кажучы харчаванне, як раз такі заключаецца ў тым, што яны пастаянна праследуюць людзей.
З Аленай Маслюковай размаўляла наш карэспандэнт Аліна Андрыевіч.
Беларускае Радыё Рацыя
Artykuł Алена Маслюкова: Людзі знаходзяцца пад пастаянным ціскам pochodzi z serwisu БЕЛАРУСКАЕ РАДЫЁ РАЦЫЯ.