Тэмпы росту беларускай эканомікі ў 2024 годзе знізяцца ўдвая?
Беларуская эканоміка ў наступным годзе знізіць свае тэмпы, але пры гэтым у Еўразійскім банку лічаць, што эканоміка краіны адаптавалася да новых умоў.
Еўразійскі банк развіцця чакае ў 2024 годзе замаруджвання тэмпаў росту эканомік краін-удзельніц. ЕАБР прадставіў макраэканамічны прагноз на 2024-2026 гады. Беларуская эканоміка ў наступным годзе знізіць свае тэмпы, але пры гэтым у банку лічаць, што эканоміка краіны адаптавалася да новых умоў.
“Эканоміка адаптавалася да новых умоў пасля шоку 2022 года. Мы бачым дынамічны рост, найперш за кошт таго, што ўдалося пабудаваць новыя ланцужкі паставак. Другі фактар – унутраны попыт, які атрымаў істотную падтрымку за кошт пашырэння крэдытавання і росту заробкаў. Вынік – у 2023 годзе эканоміка вырасце на прыкладна 4% плюс-мінус 0,1 працэнтнага пункта. У 2024 годзе мы прагназуем некаторае замаруджванне эканамічнага росту. Ён складзе каля 2%”, – гаворыцца ў прагнозе ЕАБР.
Як прыгадвае reform.by, афіцыйны прагноз сацыяльна-эканамічнага развіцця Беларусі на 2024 год, зацверджаны ўказам Лукашэнкі, мяркуе ў наступным годзе рост ВУП на 3,8%, як і сёлета.
Шэймана і Косінца Лукашэнка прызначыў адказнымі за Афрыку
Аляксандр Лукашэнка паставіў задачу памочніку Аляксандру Косінцу ўзяць на кантроль работу з Экватарыяльнай Гвінеяй і Кеніяй — краінамі ў Афрыцы, дзе ён пабываў. Гаворачы пра Кенію, Лукашэнка таксама звярнуўся да Віктара Шэймана. “Я вам ужо гаварыў падчас палёту: вазьміце і займайцеся Афрыкай, як калісьці вы пачыналі”.., — сказаў Лукашэнка. За працу з Кітайскай Народнай Рэспублікі персанальную адказнасць цяпер перад Лукашэнкам нясе першы віцэ-прэм’ер Мікалай Снапкоў, Індыю даручылі цяперашняму кіраўніку МЗС Сяргею Алейніку
У МАРГ спыталі наконт сеткі крам “Востраў чысціні”
Міністэрства антыманапольнага рэгулявання і гандлю Беларусі ў курсе сітуацыі з гандлёвай сеткай “Востраў чысціні і смаку”, але не будзе яе каментаваць, заявіў карэспандэнту Sputnik Беларусь першы намеснік міністра Іван Вежнавец. “Гэта тэма камерцыйная, таму не каментуем”, — сказаў ён. Вежнавец адзначыў, што ведамства ў цэлым адсочвае асартымент тых ці іншых тавараў на рынку, і з бытавой хіміяй праблем пакуль няма.
Раней у многіх магазінах сеткі “Востраў чысціні і смаку” рэзка апусцелі паліцы, прапалі многія віды тавараў. Перастаў працаваць інтэрнэт-магазін, роўна як і служба дастаўкі. Некаторыя крамы сеткі закрыліся. Кіруе крамамі і брэндамі група кампаній “Ромакс”. Яе асноўныя бенефіцыяры — сям’я Віктара Рамука, на якую працавалі больш за 7000 чалавек, піша “Наша Ніва”.
Еўракамісія разблакавала частку фінансавання для Венгрыі
Еўракамісія прыняла рашэнне разблакаваць частку фінансавання для Венгрыі памерам 10,2 мільярда еўра. Летась у снежні сродкі з агульнаеўрапейскага бюджэту, прызначаныя для Будапешта, былі заблакаваныя з прычын судовай рэформы і іншых праблем з вяршэнства закона, якія, паводле ацэнкі Еўракамісіі, ёсць у Венгрыі. Цяпер у Еўракамісіі прыйшлі да высновы, што Венгрыя прыняла меры і выканала ўмовы Хартыі Еўразвязу ў частцы незалежнасці судовай улады.
Польшча тым часам, пасля змены ўлады, чакае на сродкі з Плану адбудовы, якія былі таксама заблакаваныя з прычын судовай рэформы і праблем з вяршэнствам закона. Гаворка ідзе пра 59,82 мільярда еўра, з якіх крыху больш за 25 мільярдаў – гэта датацыі, астатняе – крэдыты. Новы польскі прэм’ер Дональд Туск мяркуе, што першыя рашэнні будуць прынятыя ў пятніцу, 15 снежня, па выніках цяперашніх пасяджэнняў у Бруселі.
Беларускае Радыё Рацыя.
Фота з адкрытых крыніц.