Павел Усаў: У Брусэлі Орбану быў дадзены ясны сігнал
У Брусэлі дыскутаваліся вельмі важныя пытанні, якія датычыліся Украіны і Малдовы. Абмяркуем іх з палітычным аналітыкам Паўлам Усавым.
У Брусэлі ўчора і сёння дыскутаваліся вельмі важныя пытанні, якія датычыліся Украіны і Малдовы. Абмяркуем іх з нашым суразмоўцам – палітычным аналітыкам Паўлам Усавым.
РР: Такое цікавае ноу-хау еўрапейскай палітыкі, адбылося галасаванне па пытанні Украіны, супраць заўсёды выступала Венгрыя. А тут палітыкі папрасілі на час галасавання выйсці Орбана з залы. І атрымліваецца, што ўсе прысутныя, а гэта прадстаўнікі ўрадаў краін ЕЗ, прагаласавалі “за”. Як гэта можна патлумачыць?
Павел Усаў: Орбан ужо ўспрымаецца на Захадзе выключна як праваднік інтарэсаў Пуціна. І ў ім бачаць менавіта тую асобу, якая падрывае маналітную пазіцыю, хоць ні ва ўсім яна маналітная, Еўразвязу, у дачыненні да падтрымкі Украіны. Не раз ён блакаваў выдзяленне дапамогі для Украіны, фактычна Венгрыя і Орбан, у прыватнасці, гэта прыклад унутранай слабасці ЕЗ у сэнсе нейтралізацыі расейскіх уплываў і расейскай гібрыднай палітыкі ў палітыцы ЕЗ. І Орбан не хавае сваіх прарасейскіх поглядаў. Па сутнасці, гэта тая пятая калона, якую Расея будзе выкарыстоўваць для падрыву еўрапейскіх уплываў, еўрапейскай унутранай кансалідацыі, што небяспечна. І выглядае, што еўрапейскія вядучыя краіны, такія як Нямеччына, Францыя, пачынаюць разумець, што неабходна нейкім чынам вырашаць праблему Орбана. І яму ў Брусэлі хіба ўпершыню быў дадзены ясны сігнал , што калі не жадаеш, то не перашкаджай. Магчыма, за гэтым сігналам мог паследаваць, хоць я сумняваюся, што еўрапейскія палітыкі на гэта здольныя, працэс ізаляцыі Венгрыі. То бок, я думаю, надышоў час, калі Брусэль павінен быў паставіць пытанне пра вывад Венгрыі з дамовы Шэнген, альбо нават пагражаць тым, што Венгрыя будзе выключана з ЕЗ. Гэта быў бы моцны ўдар па расейскім лобі і прадстаўніцтве ў Еўропе. І, безумоўна, паставіла б Орбана на месца.
Але мы бачым, што еўрапейскія палітыкі, як гэта шмат бывае ў крытычных момантах, намагаюцца знайсці нейкі кампраміс, які гуляе супраць Еўропы. Асабліва ў сённяшняй крытычнай сітуацыі. Але змушэнне Орбана пакінуць залу падчас галасавання адносна распачацця працэсу ўступлення Украіны ў ЕЗ, гэта, безумоўна, важны крок. Еўропа заўсёды падыходзіла да Беларусі, Украіны і Малдовы як да буфернай зоны паміж Еўропай і Расеяй. Сёння мы бачым фундаментальны перагляд сітуацыі, перагляд палажэння постсавецкіх рэспублік, такіх як Украіна і Малдова. І, безумоўна, гэта ўплывае ўскосна і на Беларусь. Што еўрапейцы ў рэшце рэшт акрэсліліся з фундаментальным геапалітычным падыходам, што гэта частка Еўропы, а не частка Расеі.
Слухайце гутарку ў далучаным файле:
Беларускае Радыё Рацыя
Фота: Еўрарадыё