Гуьржийн Iедалхоша юха а нуьцкъаша дIасалехкина протестхой
Тбилисерчу гуьржийн праламентна го бина акцин декъашхой шинарин Iуьйранна дIасалаьхкина Гуьржийчоьнан чоьхьарчу гIуллакхийн спецназо. Миллиардеран Иванишвили Бидзинан "Грузинская мечта" партин декъашхошна кхеташоне гулбала новкъарло ян гIоьртинера митингхой, гIишло дIа а къевлина. Маршо Радион корреспонденто бина и хаам.
Парламент чу воьду некъ маьрша баккха Iалашонца хиш диттина полисхоша. Оппозицино дIахьедина, шаьш протест юкъахйоккхур яц, ткъа Iедалхошна хIоразза а шайна дуьхьал ницкъ баккха дезар ду, парламенте гуллучу заманчохь аьлла.
Протестхой дIасалоьхкучу юкъанна полицино дIалаьцна масех оппозицин партийн лидер, шайлахь президент лаьттинчу Саакашвили Михаилан агIончаш а болуш.
Тахана харжамашка кандидаташ къастор масийтта кепехь ду Гуьржийчохь: партийн лаамца чулушболу а, шаьш-шайгара язлуш болу а нах цхьана харжамашка бовлуш. Ткъа оппозицино и кеп хийца а хийцина, хIора партера, церан дукхалле хьаьжжина билгалдаха деза, боху, кандидатийн могIарш.
Кху беттан 14-чохь парламентан доккхачу декъо партийн тептаршкахула харжамаш дIабахьарх низамехь хийцамаш барна дуьхьал кхаьжнаш тесна. 18-чу дийнахь Гуьржийчоьнан парламентан аьтто ца хилла болх дIабахьа: протестхоша парламент чу воьду массо а неIарш къевлинера. Хиш а детташ, бIаьргаш Iовжон газ а хецна, полицино лаьхкинера гулбелларш.
Оршотдийнахь "Грузинская мечта" партин инарла секретаро, Тбилисин мэро Каладзе Кахас дIахьедина, 2020-чу шарахь парламентан харжамаш хIинца лелаш йолчу ийначу харжаман системехь дIахьур бу аьлла.