Магасерчу митингехь хиларна кхеле хIиттийнарш бехказа бохуш мукIарло дина
"Дуккха а мехала дерг элира тешаша. Тхуна коьрта ду, бехке хиларан тешаш цаьргахьа бистхиларна", - аьлла Барахоев Ахьмадан адвокато Урусова Фатимас.
"Массо а зийначу документашлахь а бехке хилар чIагIдеш дац, ткъа бехкехиларан тешаша а цаьргахьа дош элира. Тахана ши депутат а левира, чIогIа хаза къамел дира цара а, бакъдерг дуьйцуш мукIарло дира цара. Нагахь санна, уьш ца хиллехь, митингера хьал кхин а ледара доьрзур дара бохура цара. Мелхо а массаьрга а собаре хилар доьхуш, къаьсттина аьрха болчу кегийрхошка дехарш дора цара, низамаш ца дохош хIума делаш бохуш", - чIагIдо Чемурзиев Барахан адвокато Абубакаров Мохьмада.
Делахь а, билгалдаьккхира цо, "процесс политикан бух тIехь хиларна", адвокаташ саготта бу, церан хьокъехь сацам бечу хенахь объективе кхелахой цахиларна.
2019-чу шарахь ГIалгIайчоьно Нохчийчоьнца дозанаш хуьйцуш, барт бича протесте бевлира кхеле хIиттийна Барахоев Ахьмад а, Мальсагов Муса а, Хаутиев Багаудин а, Чемурзиев Барах а, Ужахов Малсаг а, Нальгиев Ахьмад а, Саутиева Зарифа а. ШолгIачу дийне яьлла митинг полисхоша йохийра, цул тIаьхьа бехкзуламан гIуллакхаш даха долийра протесташкахь хиллачарна дуьхьал. Уьш бехкебо, экстремистийн юкъаралла кхолларна а, полисхошна дуьхьал ницкъ баккхарна а. Шайна дохку бехкаш тIе ца дуьту бехкебечара.
Стохка Лахьан-бутт бовш дуьйна йолийна ю царна тIехь дIахьон кхелан процесс. Кисловодскерчу кхелехь толлуш ду гIуллакх.
Бакъоларъяран "Мемориал" центран зерашца, Магасера митинг йирзинчул тIаьхьа 26 жигархочунна хенаш туьйхира: цхьана шарера шина шаре кхаччалц.