Казахстанехь бевзаш боцчу наха бохийна Кадыров Ахьмадна лерина хIоллам
Нохчийчоьнан таханалерчу куьйгалхочун дена, республикан хилла Оьрсийчоьнгхьа волу хьалхарчу президентана Кадыров Ахьмадна лерина болу иэсан хIоллам бохийна Казахстанерчу Малая Сарань эвлахь бевзаш боцчу наха. Оцу эвларчу кхин а цхьана хIолламна тIехь шинна а агIора "йамартхо" дешнаш йаздина баллонехь долчу басарца.
1ADAT оппозицин телеграм-канало оцу тIелатарийн ши видео арахийцира. Буьйсанна йаьхначу видеошкахь гуш ду, авторша телефонан согар латабой, йуххера гойту и хIоллам, тIаккха цхьаверг йоккха жIов йетта йолалйо цунна тIе. Кадыров Ахьмад жималлехь Iийна хIусам лаьттинчохь бу и хIоллам. Видео йаьккхинчу нехан йаьххьаш йац гуш, йа церан аьзнаш ца хеза.
Сарань гIалин ОВД-н белхахочо Кавказ.Реалиин редакцица хиллачу къамелехь бакъду элира эвлахь хилларг, цхьа хIоллам бохийна, вукхунна тIе дешнаш йаздина, бохура цо – масхьокху-беттан 5-чу буса хилла ду и ший а.
Кадыров Ахьмад вина меттиг йу Малая Сарань. ТIаьхьо тIе басар диттина болу, "Къам дезар, Делах кхерар" боху дешнашца кечбина хIоллам хIоттийнера 2012 шеран марсхьокху-баттахь. Цуьнан автора Такиров Жаика бахарехь, оцу дешнийн маьIнаца вехаш хиллера кхелхина волу хьаькам.
Марсхьокху-беттан 6 дийнахь Москварчу хенаца 12 сахьт даьлча казахийн оьрсийн маттахь йолчу зорбанашкахь хIумма а дац оцу хиламехь дуьйцуш.
Кадыров Ахьмад 1951-чу шеран марсхьокху-беттан 23-хь вина ву Казахстанерчу Караганда гIалахь, цига цуьнан доьзал дIабохийнера 1944-чу шарахь. 1957-чу шарахь бен юха ца бирзира КадыровгIеран доьзал Нохчийчу. 1995-чу шарахь Ичкерин муфтий хIоттийра иза, хIеттахь гIазот кхайкхийра цо Оьрсийчоьнна. Амма тIаьхьо федералхошца велира иза, 2000 шеран мангал-беттахь дуьйна Нохчийчуьрчу цхьана ханна кхоьллинчу администрацина куьйгалла дора цо. Иза дехьавалар оппозицихошна йамартло хета цо дуьхьалонанидейна йина.
Вийначу Нохчийчоьнан президентан Кадыров Ахьмадан васт десторах лаьцна – республикехь цуьнан ц1е лелош 300 урам бу, Соьлжа-ГIалара коьрта майда а, паркаш, Нохчийн пачхьалкхан университет, школаш, гимназеш, берийн бошмаш, "Нохчийчоьнан дог" маьждиг, "Новая газето" Чиллан-баттахь хаамбарца, шен ларми чохь дуккха а нах байина Росгвардин полк а. Цул совнах, махкахь футболан а, латархойн а клубаш ю, иштта, 2020-чу шеран ГIуран-баттахь дуьйна Америкерчу финансийн санкцйин тептаре язйина Кадыров Ахьмадан цIарах фонд а ю.
Нохчийчохь 346 урам бу КадыровгIеран доьзалан декъашхойн сий деш цIерш техкина, тIаккха церан цIерш хийца атта хилийта Iедало ур-атталла меттигера низамаш а хийцина, йаздо "Би-би-си-н оьрсийн сервисо". Масала, воккхачу Кадыровн цIе лелош йу Соьлжа-ГIалара футболан клуб, стадион а, гIоьналлин фонд, гIалара бIов, меттигера аэропорт а.
Хьалхо Балканашкахь Кадыровн алерина барамаш д1ахьора. Дуьйцура, Сербехь Кадыров Ахьмадан цIе тиллина урамна, цуьнан цIе лелор ю цигахь йилла леринчу хьафизийн хьуьжаро, бохуш. Кадыровн-воккхахчун цIе туьллур ю аьлла парканна Къилбаседа Македонехь. Боснехь а хир ю Кадыровн Ахьмадан парк, цул совнах, тIай хир ду Кадыров Рамзанан цIе лелош. Хьехавора Нохчийчоьнан таханлера куьйгалхо Сербин Республикан а, Боснин а, Герцоговинан а фестивалехь.