Петербургехь лаьцна Мусаева Заремина тIехIуттуш пикете ваьлларг
Санкт-Петербургера вахархо Кузьмин Дмитрий цхьааллин пикете ваьллера "Маршо ло Мусаева Заремина" тIейаздина плакат а карахь. Иза лаьцнера, тIаьхьо протокол а хIоттийна дIахецнера. Мусаева – нохчийн вежарийн-оппозиционерийн нана йу, полисхочунна тIелеттера аьла, бехкейина иза. "Мемориало" политикан тутмакх лерина Мусаева.
Неван проспектехь дIахьош вара Кузьмин пикет, Санкт-Петербургера гIалин думин гIишлона хьалха, хаамбина "ОВД-Инфо" гIирсо. Полицин белхахоша лаьцна, шайн декъе дIавигинера иза. Цигахь протокол хIоттийнера гIалин административан кодексан антикивидан дозанех йолчу артиклехула, цул тIаьхьа маьрша витира. Оцу Iедалан къепехь уггар лакхара гIуда ду 4000 сом ахча.
Мусаева Зарема – бакъоларйархочун Янгулбаев Абубакаран а, 1АДАТ боламца боьзначу оппозиционерийн ЯнгулбаевгIеран ИбрахIиман а, Байсангуран а нана йу. Дечкен-беттан 20-хь Нижний Новгородерчу петар чу а лилхина, нуьцкъаха Мусаева Соьлжа-ГIала дIийигира кадыровхоша. Мусаева Заремина полисхо сийсазварна, лазорна бехкейина, чохь даккха I5 де-буьйсий туьйхира кхело. Цул тIаьхьа цунна дуьхьала бехктакхаман гIуллакх гIаттийра – дийцарехь, протокол хIотточу юкъанна полисхочунна тIелеттера иза. Кадыров Рамзана бахарехь, "цхьана мIаьргонна цуьнан бIаьрг боккхуш" хиллера цо. ТIаьхьо хьарамлонаш лелорна бехке а йира и. Дуьххьара, теше санна хеттарш дан, цу бахьанца Нохчийчу дIайигна а йара.
Товбеца-беттан 4-чохь Соьлжа-ГIалара кхело колонихь даккхийта пхи шой ахшой туьйхира Мусаевана – оццул хан йоьхура прокуратуро а. 52 шо долчу зудчунна тIаьхьабовлар политикан бух болуш лору бакъоларйархошна, адвокаташа масийттазза дIахьедира цуьнан гIуллакхехь харцонаш лелийна хиларх.
54 шо долу Мусаева инсулинах йоьзна йу, диабет а, кхин а лазарш шен дегIаца долуш йу иза. Лаьцна латточу йукъанна могушалла кхин тIе а эшнера цуьнан.
2022-чу шеран дечкен-беттахь, Мусаева лачкъийна дукха хан йалале, Санкт-Петербургера жигархочо Сметанкина Евгенияс цхьааллин пикет хIоттийра цуьнгахьа гIо доккхуш. Полисхой йукъа а ца гIуртуш йирзира акци. Масех де даьллачул тIаьхьа Санкт-Петербургехь иштта кхин а цхьа пикет хIоттийра, цигахь а ца лецира декъашхо. Кху шеран дечкен-баттахь Москвахь "Маьршайаккха Мусаева Зарема" плакат карахь пикет хIотторна лецира жигархо Сайфутдинова Анна, цул тIаьхьа дIахийцира иза протокол ца хIоттош.