Кадыров Рамзанан гонерчу нахана пачхьалкхан совгIаташ дина
Оцу кепара омра зорбане даьккхина Кремлан официалан сайтехь. "Къахьегарна а, дуккхаъ а шерашкахь белхаш барна а" совгIат дина Кадыров Хас-Мохьмадна, Лорсановна – "могушалла Iалашйарехь доккха дакъа лацарна а, хьанал дуккха а шерашкахь къахьегарна а" йелла. Дудаевна – къаьмнийн йукъаметтигаш чIагIйарна а, социалан мехала пректаш кхочушйарна а" дина. Стенна тIехь цара хIун дакъалаьцна, билгалдаьккхина дац.
СовгIат динарш декъалбеш пост хIоттийна Кадыров Рамзанан телеграм-каналехь.
32 шо долу Кадыров Хас-Мохьмад – Кадыров Рамзанан шичин кIант ву, Соьлжа-ГIалин мэр хIоттийна иза 2021-чу шарахь. 2017-чу шарахь, шен 26 шо долчу заманчохь цо куьйгалла дира Соьлжа-ГIалин полицин, ткъа 2020-чу шеран лахьан-баттахь Нохчийчоьнан куьйгалхочун администрацин а, министрийн кабинетан а куьйгалхо вира цунах. Юрист ву Кадыров Хас-Мохьмад, Нохчийн пачхьалкхан университет чекхйаьккхина цо "Юриспруденция" говзалла кара а йерзош.
38 шо долу Лорсанов Сулейман могушалла Iалашйаран министр хилира 2022-чу шеран стигалкъекъа-баттахь, 2019-2021-чу шерашкахь Соьлжа-ГIалара номер 1 йолчу дарбанан цIийнан коьрта лор вара иза. Лорсановс чекхйаьккхина Воронежан пачхьалкхан Бурденкон цIарах лоьрийн академи.
Дудаев Ахьмадан 36 шо ду, 2020-чу шарера схьа дуьйна ву иза ша дIалаьцначу даржехь. Цул а хьалха кхаа шарахь куьйгалла дира Дудаевс ЧГТРК "Грозный" телеканалан, кхин а хьалха цо белхаш бина мехкан урхалхочун администрацехь кеп-кепарчу даржашкахь. Соьлжа-ГIалин мехкадаьттан институт чекхйаьккхина Дудаевс, цул тIаьхьа РАНХиГС (Оьрсийчоьнан халкъан бахаман а, пачхьалкхан гIуллакхдаран а академи) чекхйаьккхина, "Пачхьалкхан а, муниципалан а урхалла" говзалла Iамош.
Кадыровн рожан пропагандица агIо латтош ву Дудаев. Халкъан ламасташца доьзна цо республикехь нахана хьалха стаг дIа а хIоттош, цуьнан йуьхь йохуш, цуьнга къурд алийтар, дIахьедира, шен урхалло терго латтош йу махкара арабевллачу бахархойн "леларна" тIехь бохуш. Журналистана Милашина Еленина а, адвокатна Немов Александрна а къиза Соьлжа-ГIалахь йеттарх лаьцна вистхуьлуш, цо бохура "малхбузен къайлахчу сервисийн почерк йу", ткъа журналисто "доллу къам" сийсаздина элира. Нохчийчоьнан куьйгалхочун кIанта Кадыров Адама, КъорIан дагорна бехкевина, Соьлжа-ГIалара СИЗО-хь латтош хиллачу Журавель Никитина йеттар къобалдира министро – цо бахарехь, Адама "дIагайтина, ша шайн сийлахьчу цIийнан хьакъволу векал" хилар.
Дахначу кIиранах Путина совгIат дира Нохчийчоьнан муфтийна Межиев Салахьна сийлаллин кехатца "динаш йукъахь а, къаьмнашна йукъахь а уьйраш латторехь" дакъалацарна аьлла.
Ши кIира хьалха Кадырова Iайшатна, Нохчийчоьнан урхалхочун Кадыров Рамзанан йоIана, махкахь культурин министран даржехь йолчу, совгIат дира "Даймахкана гIуллакхаш дарна" аьллачу орденан мидалца. Ткъа "Даймахкана гIуллакхаш дарна" IV-чу барамехь орден йелира Нохчийчоьнан урхалхочун администрацин куьйгалхочунна Таймасханов ГIаласна.
ТIаьххьарчу беттанашкахь федералан пачхьалкхан совгIаташ делла Кадыровн кхечу гергарчарна а тIаьхьа. Марсхьокху-баттахь Нохчийчоьнан вице-премьерна, мехкан урхалхочун невцана Тумхаджиев Iийсанна IV-чу бараман орден йелира "Даймахкана гIуллакхаш дарна" аьлла. Иштта марсхьокху-баттахь Путин Владимира шен куьйга совгIат дира Кадыровн нанна – Айманина – Сийлаллин орденца. Товбеца-баттахь 26 шо долчу Кадыров Рамзанан вешин кIантана, иштта республикехь вице-премьеран а, бахаман, латтанийн йукъаметтигийн министран даржехь волчу Кадыров Хьамзатана "Даймахкана гIуллакхаш дарна" аьлла, II-чу барамехь мидалан орден йелира. Стигалкъекъа-баттахь "Нана-турпалхо" седа белира Кадырова Меднина – политикан хIусамнанна.