Журавелан гIуллакхехула зен хилла ву боху 13 имам йуха а кхеле ца веана

КъурIан дагорна бехке лоручу 19 шо долчу Журавель Никитин Соьлжа-ГIалара гIуллакх листар доьазза дIатеттина. ГIуллакхехула зен хилларш санна дакъа лоцуш волу 13 имам кхеле ца веана йуха а – и ду дIататтаран бахьана. Хьалхо а баьхкина бац уьш кхеле. РогIера кхеташо лахьан-беттан 28-хь хир йу боху пачхьалкхан ТАСС агенталло.

Зен хилларш кхелехь бацахь а, хьалхо хиллачу кхеташонехь талламо балийнчу тешашка видеохIенехула хеттарш дан кхиъна кхел – Волгоградерчу маьждиган имаме Бектемиров Ильясе а, VI.ru сайтан корреспонденте Богданов Иване а, иштта дуьхьало йина адвокаташа кхелахо Дандаев Руслан гIуллакхера араваккха аьлла дина арз тIеэца – цо озабезамаш бийр бу аьлла хета царна.

Дагадоуьйту, хьалхара кхелан кхеташо ца хилира, Журавель кхеле ца валорна. ТIахьо цуьнан йуьхь тIехь Iаржйеллла меттиг йара гуш.

Нохчийчоьнан куьйгалхочун 15 шо долчу кIанта Кадыров Адама кху аьхка йиттира лаьцна латточу Журавель Никитина. Полицино дуьхьало йира бехктакхаман гIуллакх долон, Адаман жоьпалле озон хан тIекхаьчна йац аьлла. Цул тIаьхьа Нохчийчоьнан куьйгалхочун кIантана ворхI совгIат дира: йуьхьанца республикин "турпалхо" вира цунах, цул тIаьхьа ГIезалойчоьнан а, Кхарачой-Чергазийчоьнан а, ГIебарта Балкхаройчоьнан а совгIаташ делира, цул совнах, "Умматана хьалха гIуллакъаш дарна" I-чу бараман орденца а, иштта нохчийн "Даймехкан сий" орден а йелира.

КъорIан дагийна аьллачу шеконашца Журавель Никита лецира стигалкъекъа-беттан 21-хь. Талламан комитетан куьйгалхочун Бастрыкин Александран тIедилларца, гIуллакх билггал Нохчийчу дIаделира – цигара "дуккха а" дехарш кхочура, шаьш зен хилларш лара оцу гIуллакхехула аьлла бух балош.