Որևէ վտանգ չենք տեսնում ՌԴ-ից ռազմամթերքի մատակարարման վերահսկողության մեջ, ՀՀ-ն սպառազինությունների վերահսկման միջազգային ռեժիմների մասնակից է. ՊՆ փոխնախարար
Ռազմական նշանակության արտադրանքի մատակարարման բնագավառում վերահսկողական մեխանիզմների ձևավորումը միջազգային պրակտիկայում բնականոն, եթե չասենք պարտադիր երևույթ է և նպատակ է հետապնդում բարելավել երկկողմ ռազմատեխնիկական համագործակցության արդյունավետությունն ու ապահովել մատակարարվող արտադրանքի նպատակային օգտագործումը։
Тert.am –ի հետ զրույցում այս մասին հայտնեց ՀՀ պաշտպանության փոխնախարարի տեղակալ Արտակ Զաքարյանը՝ անդրադառնալով «Հայաստանի ու ՌԴ-ի միջև ռազմատեխնիկական համագործակցության զարգացման մասին պայմանագրի շրջանակներում մատակարարվող ռազմական նշանակության արտադրանքի առկայության և նպատակային օգտագործման նկատմամբ հսկողության իրականացման կարգի մասին» 2016թ․ հոկտեմբերի 13-ին Երևանում ստորագրված համաձայնագրի շուրջ մեկնաբանություններին, որոնցից հիմնականն այն է, որ սրանով հայաստանյան Զինված ուժերը մտնում են ՌԴ պաշտպանության վերահսկողության տակ:
Շարունակելով՝ Արտակ Զաքարյանն ասաց. «Հայաստանը սպառազինությունների վերահսկման միջազգային ռեժիմների մասնակից պետություն է և որևէ վտանգ չի տեսնում այս գործընթացում, մանավանդ՝ այն իրականացվում է մեր ռազմավարական դաշնակից պետության հետ և հիմնված է բավականին ընդգրկուն երկկողմ իրավապայմանագրային դաշտի և արդեն իսկ առկա համագործակցության մեծ փորձառության վրա։ Ավելացնեմ, որ նմանաբնույթ համաձայնագիր վաղուց գործում է ՀԱՊԿ շրջանակներում»:
ՀՀ պաշտպանության փոխնախարարն ընդգծեց այն հանգամանքը, որ համաձայնագիրն ունի փոխադարձ բնույթ: Այսինքն` նույն վերահսկողությունն էլ մենք ենք իրականացնելու Ռուսաստանի՝ Հայաստանի Հանրապետությունից ռազմական նշանակության արտադրանք ձեռք բերելու դեպքում:
Մեկնաբանելով արդեն իսկ հնչող կարծիքները, որ սույն վերահսկողության նպատակն այն է, որ Հայաստանը չկարողանա զենք մատակարարել որևէ երրորդ երկրի և նման երրորդ երկիր կարող է լինել, օրինակ, Արցախը, Արտակ Զաքարյանն ասաց. Հայաստանը սպառազինությունների ձեռքբերման իր քաղաքականությունը կառուցում է միջազգային պարտավորությունների և ընդունված ընթացակարգերի, երկկողմ և բազմակողմ պայմանավորվածությունների հարգման սկզբունքի շրջանակներում և երբևէ խնդիր չի ունեցել այդ առումով»:
Նշենք, որ ԱԺ քառօրյայի մեծ օրակարգում և առաջիկայում Ազգային ժողովը պետք է վավերացնի համաձայնագիրը:
Հիշեցնենք, այն ստորագրվել էր 2016թ․հոկտեմբերի 13-ին՝ Երևանում, իսկ ստորագրումը նախատեսվում էր «Հայաստանի Հանրապետության և Ռուսաստանի Դաշնության միջև ռազմատեխնիկական համագործակցության զարգացման մասին պայմանագրով»։
Այսինքն` համաձայնագիրը պայմանավորված չէ ՀՀ սահմանադրական փոփոխություններով։