Հանդիպումների նպատակն իրականում զուտ հանդիպում կազմակերպելն է, որպեսզի Մինսկի խմբի ֆորմատը շարունակի աշխատել. Ալ. Իսկանդարյան
Քաղաքագետ Ալեքսանդր Իսկանդարյանը Ղարաբաղյան հակամարտության շուրջ ստեղծված իրավիճակում դեռևս որևէ լուրջ փոփոխություն չի ակնկալում: Նա լրագրողների հետ զրույցում նշեց, որ թեպետ սահմանային լարվածությունը նվազել է՝ նախորդ տարվա համեմատ, այնուամենայնիվ, այն կա:
«Ղարաբաղյան հակամարտությունն այն փուլում չէ, որ կարելի է ակնկալել որևէ լուրջ շարժ: Գիտենք, որ Մինսկի խումբը զբաղվում է ոչ թե հակամարտության լուծմամբ, այլ սահմանին լարվածության նվազեցմամբ: Եվ այդ հետաքննական, խախտումն իրականացնողին բացահայտելուն միտված մեխանիզմները պարզապես գործիքներ են, որոնք աշխատում են լարվածությունը զսպելու, ոչ թե հակամարտությունը լուծելու համար»,- ասաց նա:
Անդրադառնալով ԵԱՀԿ Մինսկի խմբի համանախագահների օգնությամբ կազմակերպված Հայաստանի և Ադրբեջանի արտգործնախարարների հանդիպմանը՝ Իսկանդարյանը նշեց, որ միշտ էլ խոսել ենք նրա մասին, որ բանակցային գործընթացը վերականգնվում է, և դա ասվում է բոլոր հանդիպումներից հետո: «Ցանկանում են բանակցային գործընթացը պահպանել, քանի որ այն անհրաժեշտ է»,- ասաց նա՝ միաժամանակ նկատելով, որ հիմա հիմնախնդրի կարգավորմանը սպասելն անիրատեսական է:
Tert.am-ի դիտարկմանը, թե այս անգամ ԵԱՀԿ Մինսկի խմբի համանախագահների կողմից հայտարարություն չեղավ Վիեննայի և Սանկտ Պետերբուրգի պայմանավորվածությունները պահելու մասին, արդյոք սա նշանակո՞ւմ է, որ Ադրբեջանը հասավ իր նպատակին, Ալեքսանդր Իսկանդարյանը պատասխանեց. «Դա վաղուց այդպես է: Հիմա, իհարկե, Ադրբեջանի հետ շատ դժվար է»:
Նա նաև նկատեց, որ Ադրբեջանը բազմաթիվ խնդիրներ ունի, և չնայած միջազգային հանրությանը նյարդայնացնում է, սակայն համարել, որ դա պատճառ կդառնա, որ Ադրբեջանը ԼՂ հիմնախնդիրը լուծի հայկական կողմի օգտին, չի կարելի:
«Ադրբեջանին հիմա դժվար է ինչ-որ բան ստիպելը: Փաստ է, որ իրականում հանդիպումների նպատակը հանդիպում կազմակերպելն է ընդամենը ու փորձելն է այնպես անել, որ Մինսկի խմբի ֆորմատը շարունակի աշխատել»,- նշեց նա: