Բյուջեի հիմքում դրված 3.2 տոկոս տնտեսական աճից բարձր ցուցանիշ է լինելու, այն հավանաբար 4.3 տոկոսի կհասնի. Վարդան Արամյան
Բյուջեի հիմքում դրված 3.2 տոկոս տնտեսական աճից բարձր ցուցանիշ է լինելու, այն հավանաբար 4.3 տոկոսի կհասնի. այսօր տարեկան գործունեության հաշվետվության ժամանակ այս մասին հայտարարեց Ֆինանսների նախարար Վարդան Արամյանը՝ անդրադառնալով մինչև տարեվերջ եղած տնտեսական աճի հետ կապված սպասումներին:
Ըստ նախարարի՝ նույնիսկ գյուղատնտեսական ոլորտի բացասական ֆոնի առկայությամբ բազային էֆեկտով առաջիկա ամիսներին էական նվազում չի լինի:
«Մեր բոլոր մոդելները և առկա գործիքակազմը թույլ են տալիս ասել, որ մինչև տարեվերջ նախատեսված 3,2 տոկոսի փոխարեն կունենանք 4,3 տոկոս տնտեսական իրական աճ »,-նկատեց նա:
Ըստ նրա՝ տնտեսական ակտիվության ցուցանիշը հունվար-օգոստոսին կազմել է 6,2 տոկոս:
Թեև ներդրումների մասով պատասխանատու կառույցը Ֆինանսների նախարարությունը չէ, բայց ՀՀ ֆինանսների նախարար Վարդան Արամյանը վստահում է Տնտեսական զարգացման և ներդրումների նախարարության սպասումներին, և այն պնդմանը, որ այսօրվա դրությամբ խոստացված $832 մլն-ից շուրջ 400 մլն-ն արդեն իրականացվել է:
«Ներդրումը ներդրում է, բայց շատ դեպքերում շփոթ կա՝ արդյոք դրանք պե՞տք է համադրելի դարձնենք օտարերկրյա ներդրումների հետ: Դրանք տարբեր ցուցանիշներ են, խոսքը ՀՀ ներքին տնտեսությունում կատարվող ներդրումների մասին է, կարևոր չէ, թե որ աղբյուրից է, կարևորը ծրագրերն են, որոնք պետք է այս տարվա ընթացքում իրականացվեն»,-ասաց նա:
Նախարարը մատնացույց արեց տնտեսական ակտիվության ցուցանիշը, որը 5,5% աճ է գրանցել: «Այսինքն՝ որևիցե ճյուղային մասով անակնկալ չունենք՝ բացառությամբ գյուղատնտեսության, որտեղ 25% անկում է նկատվել»,-ասաց նա և նշեց, որ նման տոկոսային անկման գործոնը բացատրվում է բազային էֆեկտով, այսինքն՝ անցած տարվա տնտեսական ակտիվություն գործոնով: