Սպասել, որ Հայաստան-Սփյուռք համաժողովը կարող էր միավորել աշխարհի հայերին մի հարցի շուրջ, լուրջ չէ. Ալ. Իսկանդարյան
Սպասել, որ Հայաստան-Սփյուռք համաժողովը կարող էր միավորել աշխարհի հայերին մի հարցի շուրջ, լուրջ չէ. լրագրողների հետ զրույցում, խոսելով Հայաստան-Սփյուռք 6-րդ համաժողովից ստացած իր տպավորությունների մասին, այսպես ասաց «Կովկասի» ինստիտուտի տնօրեն, քաղաքագետ Ալեքսանդր Իսկանդարյանը:
«Ես չեմ կարող ասել, որ հանդիպման նպատակն իրականացավ, քանի որ ոչ մի լուրջ նպատակ դրված չէր»,- նշեց նա՝ նկատելով, որ պաշտոնյաների կողմից ներկայացված զեկույցներն էլ բավականին «շաբլոն» էին:
Նա նշեց, որ անգամ կուլուարներում քննարկումներն իրենցից նորություն չէին ներկայացնում: «Թվերի մասին չեմ կարող խոսել, բայց, կարծեմ, այս անգամ մասնակիցների թիվը մեծ էր: Բայց, ամեն դեպքում, թիվը լուրջ ազդեցություն չի ունեցել համաժողովի վրա»,- ասաց նա:
Ալեքսանդր Իսկանդարյանը նաև նկատեց, որ ամեն դեպքում համաժողովին մասնակցել է սփյուռքի շատ փոքր մասը: «Կազմակերպել համաժողով և փորձել սփյուռքին մեկ միասնական մարմին դարձնել, կարելի է անել ինչ-որ տեղ Իրանում կամ Լիբանանում: Իսկ մնացած երկրներում ես չեմ պատկերացնում, թե ինչպես դա կարելի է անել. ԱՄՆ-ում, Կանադայում, Ֆրանսիայում և Վրաստանում ապրող մարդիկ տարբեր են, և նրանք շատ տարբեր ձևերով են մասնակցում համայնքային կյանքին, երբեմն անգամ չեն էլ մասնակցում: Նրանց բոլորին հավաքել և համախմբել մեկ գլխարկի տակ և ստեղծել մեկ մեխանիզմով աշխատող միություն, շատ դժվար է»,- ասաց նա: