Անսովոր քանդակներ, որոնց մասին շատերը գուցե չգիտեն (լուսանկարներ)
Ինչպես ասում էր գերմանացի հայտնի փիլիսոփա, արվեստի տեսաբան Ֆրիդրիխ Վիլհելմ Յոզեֆ Շելինգը՝ քանդակը քարացած երաժշտությունն է: Քանի դեռ զբոսաշրջիկները շտապում են լուսանկարվել Ռոդենի, Բերնինիի և Միքելանջելոյի հայտնի գործերի մոտ, bigpicture.ru-ն առաջարկում է ծանոթանալ աշխարհի տարբեր անկյուններում տեղ գտած ոչ այնքան հայտնի, սակայն նույնքան ուշադրության արժանի քանդակների հետ:
ԱՄՆ Տեխաս նահանգի Իրվինգ քաղաքի Լաս Կոլինաս շրջանում գտնվող մուստանգների արձանը ձիերի երամակի ամենամեծ արձաններից մեկն է աշխարհում: Այն խորհրդանշում է այն դինամիկան և անսանձ ոգին, որոնք բնորոշ էին Տեխասին նահանգի յուրացման ժամանակ:
Նյու Յորքում գտնվող և «Ընդարձակում» (Expansion) անվանումը ստացած այս արձանը հրավիրում է մեզ խորհել մեր իրական ինքնության մասին և հարց ուղղել ինքներս մեզ. արդյոք մենք մեզ կճանաչենք, եթե դուրս գանք մեր մարմնից ու շրջակա աշխարհի կողմից մեզ պարտադրված «թաղանթից»: Ըստ արձանի հեղինակի՝ ծնված օրվանից աշխարհը մեզ է փոխանցում արդեն պատրաստի այդ «թաղանթը»՝ սեռի, սոցիալական ապահովագրության կոդի, ռասայի ու մասնագիտության տեսքով: Հեղինակը հարց է ուղղում մարդկությանը. արդյո՞ք դա նաև այն է, ինչ կա մեր ներսում:
Լեհաստանի Վրոցլավ քաղաքում գտնվող այս արձանը կանգնեցված է ի պատիվ «անհայտ» անցորդի, այն խորհրդանշում է լեհերի հակակոմունիստական պայքարը 1980-ականներին և մարդու անհատականության վրա գործադրված ճնշումը կոմունիզմի իշխանության տարիներին:
Այս հետաքրքիր սաղմոնը գտնվում է ԱՄՆ Պորտլանդ քաղաքում և հրավիրում է հաճախորդներին տեղի ամենահայտնի ձկնային ռեստորաններից մեկը:
Ֆրանսիայի Մարսել քաղաքում ճանապարհորդներին նվիրված այս արձանների խումբը հուզիչ պատմություն ունի: 2013թ.-ին տեղադրված արձաններից յուրաքանչյուրի վրա բացակայում է մարմնի որևէ հատված: Դատարկության պատճառների մասին մնում է միայն ենթադրություններ անել. մարդկանց ինչ-որ բան չի հերիքում, կամ էլ նրանք ճանապարհորդելիս պարզապես ինչ-որ տեղ թողել են իրենց մի մասնիկը:
«Ո՛չ բռնությանը» անվանումը կրող այս յուրահատուկ արձանը հայտնի է նաև «Քարկապ գցված ատրճանակ» անվանումով, այն գտնվում է ԱՄՆ Նյու Յորք քաղաքում: Արձանը կանգնեցվել է 1980թ.-ին՝ Ջոն Լենոնի սպանության հիշատակին՝ շվեդ արվեստագետ Կառլ Ֆրեդրիկ Ռոյթերսվորդի կողմից:
Հունգարիայի մայրաքաղաք Բուդապեշտում Դանուբ գետի ափին անմահացված այս կոշիկները խորհրդանշում են Երկրորդ համաշխարհայինի տարիներին հրեաների մասսայական կոտորածը: Ֆաշիստները հրամայել էին հրեաներին հանել կոշիկներն ու գնդակահարել նրանց: Զոհերի մարմինները քշվեցին գետի ջրերի կողմից, իսկ ողբերգության մասին որպես միակ հիշեցում մնացին այս կոշիկները:
Ավստրալիայի Ադելաիդա քաղաքում առևտրի կենտրոններից մեկի դիմաց տեղակայված այս չորս խոզուկների անուններն են Օլիվեր, Ավգուստա, Հորացիո և Տրյուֆել:
