Ընդամենը 1 տարվա աճն իր հետ աշխատատեղեր չի բերում. Վարդան Արամյան
Ֆինանսների նախարար Վարդան Արամյանը տեղին չի համարում Tert.am-ի դիտարկումը, թե ինչպես է ստացվում, որ ամփոփելով տարվա գործունեությունը՝ հայտարարում են գրեթե բոլոր առումներով դրական միտումներ՝ տնտեսական ակտիվության աճ, 400 մլն դոլարի ներդրումներ, նախատեսվածից բարձր տնտեսական աճի սպասումներ և այլն, բայց կոնկրետ արդյունք չի նկատվում՝ մասնավորապես աշխատեղերի շուկայում:
Արամյանը ճշգրտեց, որ ինքը չի ներկայացնում, որ 16թ.-ը դրական է, որովհետև 2014-2015թթ.-ին արձանագրված ճգնաժամից հետո գտնվել են ճգնաժամի ֆոնի վրա:
«Այսինքն՝ բացական էֆեկտները, որ թափանցել են և՛ միջազգային կապիտալի շուկայից, և՛ Ռուսաստանից, դեռևս պահպանել են»,-ասաց նա:
Իսկ 2017թ.-ի վերելքի ժամանակահատված, ըստ նրա, այո կա: «Բայց մասնագիտական տեսակետից նման պնդում չի կարելի անել, որովհետև ընդամենը 1 տարվա աճն իր հետ աշխատատեղեր չի բերում: Երբ որ տեղի է ունենում տնտեսական ակտիվության աճ, ո՞վ է ստեղծում այդ աճը՝ տնտեսվարող սուբյեկտներ են, որոնք դա ապահովում են ներդրումների ու թողարկման ծավալների աճի միջոցով: Հիմա նրանք եթե ճգնաժամային իրավիճակում պարտադրված են եղել որոշակի կրճատումների գնալ, հիմա ունեն չօգտագործված պոտենցիալ: Միանգամից տեսնել, որ տնտեսական աճն իր հետևից քաշում է աշխատատեղեր, դա չի լինում»,-ասաց նա:
Վարդան Արամյանը շարունակեց օրինակով բացատրել, թե ներդրում կատարած տնտեսվարողը, որպեսզի իր պոտենցիալի պիկին հասնի, պետք է աշխատի 40 հոգի:
«Ակնհայտ է, որ միանգամից 40 հոգի չի բերի, պետք է թողարկի, նոր աշխատանքի ծավալների մեծացմանը զուգընթաց եթե աշխատատեղեր արդեն իսկ կան, աշխատավարձերը բարձրացնի, եթե աշխատեղերի թափուր տեղեր կան, նոր մարդիկ գրավի»,-ասաց նա։
Ավելին՝ նախարարը համաձայնեց, որ առաջին եռամսյակում գրանցվել է գործազրկության աճ:
«Այո, այդպես է, սովորաբար երբ որ լինում է տնտեսական աճ, ընդ որում լինում են կառուցվածքային տեղափոխություններ, լինում է նաև ֆրիկցիոն գործազրկություն: Իսկ դա նշանակում է, որ ժամանակի ընթացում երբ փակվում են ոչ արդյունավետ աշխատեղերը և նորերն են բացվում, աշխատուժի տեղափոխության համար ժամանակ է պահանջվում: Օրինակ բերեմ, եթե մարդը ժամանակին մատուցող էր, հետո՝ գործավար, միանգամից չի կարող աշխատանք գտնել, իրեն ժամանակ է պետք գործավարի հմտություններ ձեռք բերելու համար, իսկ ժամանակային այս խեղումը տնտեսությունում կոչվում է ժամանակավոր գործազրկություն»,-ասաց նա:
Նախարար Արամյանը շարունակեց, թե միգրացիոն հոսքը ևս ազդել է գործազրկության վրա: «25 000 տնտեսապես ակտիվ բնակիչներ նախորդ տարիների ընթացում, երբ լքել են երկիրը, ցուցանիշը հարաբերականորեն աճել է»,-ասաց նա:
Նախարարը նշեց, որ նման վերլուծության համար պետք է պարբերաշրջանը նայել՝ 5-7 տարվա կտրվածքով ինչպես է վարքագիծը եղել:
Իսկ թե սովորական շարքային քաղաքացին ինչպե՞ս է զգում իր վրա այդ դրական միտումները, Արամյանը բացատրեց, թե լավագույնը նկատելի է սպառման պահանջները դիտարկելով:
«Վերջին 2-3 տարիներին սպառումն անընդհատ անկում է ապրել, իսկ 2017թ.-ի առաջին եռամսյակում առաջին տարին է, որ սպառումն աճ է ունեցել, դա նախանշում է դրական միտումների մասին»,-ասաց նա և նշեց, որ ժողովուրդը ավելին չի սպառի, եթե չունենա հնարավորությունները։
«Դրա համար երկու խնդիր կա՝ կամ եկամուտները փաստացի այսօր աճում են կամ էլ ապագայում իր եկամուտների աճի հաշվին է անում»,-ասաց նա: