Սիրիայի ԱԳՆ-ն հայտարարել է, որ չի ճանաչում Իրաքյան Քուրդիստանի հանրաքվեն
Սիրիայի արտաքին գործերի նախարար Վալիդ ալ Մուալլեմը հայտարարել է, որ Իրաքյան Քուրդիստանի հանրաքվեն հակասահմանադրական է ու անօրինական, և պաշտոնական Դամասկոսը ճանաչում է միայն միասնական Իրաքը: Այս մասին գրում է բրիտանական Reuters գործակալությունը՝ հղում անելով սիրիական ՍԱՆԱ պետական գործակալությանը:
Սիրիայի արտաքին գործերի նախարարը հայտնել է, որ Իրաքի պառակտմանը բերող ցանկացած գործողություն Սիրիան մերժում է ու դատապարտում:
Հիշեցնենք, որ Իրաքյան Քուրդիստան ինքնավար շրջանում այսօր մեկնարկել է անկախության հարցով հանրաքվեն: Բաղդադում հանրաքվեն անօրինական են անվանել:
ԱՄՆ-ի, Ֆրանսիայի, Գերմանիայի և ՄԱԿ-ի ներկայացուցիչներն Իրաքյան Քուրդիստանի ղեկավար Մասուդ Բարզանիի հետ հանդիպմանն առաջարկել էին հետաձգել հանրաքվեն: Նա, սակայն, հայտարարել էր, որ հանրաքվեն կկայանա նշանակված ժամկետներում, եթե նրան չառաջարեն այլընտրանք: Բարզանին սեպտեմբերի 14-ին հայտնել է, որ ստացել է նման այլընտրանք Արևմուտքի մի շարք երկրներից, բայց հանրաքվեի անցկացման հարցերով բարձրագույն հանձնաժողովն ավելի ուշ մերժել է առաջարկը: