Եթե պետության առաջին դեմքերը ՄԱԿ-ի ամբիոնից ասում են, որ կստորագրեն ԵՄ համաձայնագիրը, հուսով եմ՝ նահանջելու տեղ չունենք. Ստ. Գրիգորյան
Մտավախություն միշտ կա, որ Ռուսաստանը ճնշում կգործադրի Հայաստանի վրա տարբեր ձևերով, բայց եթե պետության առաջին դեմքերը ՄԱԿ-ի ամբիոնից հայտարարում են, որ կստորագրեն ԵՄ շրջանակային համաձայնագիրը, հուսով եմ, որ նահանջելու տեղ չունենք, կստորագրենք:
Այս մասին այսօր «Մեդիա կենտրոնում» հրավիրված մամուլի ասուլիսին ասաց Գլոբալիզացիայի և տարածաշրջանային համագործակցության վերլուծական կենտրոնի ղեկավար Ստեփան Գրիգորյանը:
«Պետք է չմոռանալ, որ ԵՄ համաձայնագիրը տարբեր երկրների համար 2015-2016 թթ.-ից հետո սկսեց գործել., և՛ Մոլդովան, և՛ Ուկրաինան, և՛ Վրաստանը ստացան առանց մուտքի վիզայի (visa-free) ռեժիմը: Այդ երկրների փորձը մեզ համար անչափ կարևոր է, որովհետև նոյեմբերին պետք է ստորագրենք շրջանակային համաձայնագիրը»,-ասաց Ստեփան Գրիգորյանը:
«EURACTIV Poland» ինֆորմացիոն պորտալի գլխավոր խմբագիր Կարոլինա Զբիտնևսկան էլ իր խոսքում նշեց, որ Լեհաստանն ու Շվեդիան են եղել Եվրոպական հարևանության ծրագրերի ճարտարապետները, և դա եղել է դեռևս 2008 թ. Լեհաստանի և Շվեդիայի ԱԳ նախարարների համատեղ հայտարարության շրջանակում, դա հաստատվել է նաև Եվրամիության հանձնաժողովի նախագահ Ժան Կլոդ Յունկերի հայտարարության մեջ, որն ասել է, որ Եվրոպան ունի արևելյան ու արևմտյան թևեր, կոչ է արել դրանք միավորել իրենց արժեքների, գաղափարախոսության շրջանակում: Խոսքը Եվրոպական հարևանության ծրագրի 6 երկրի մասին է:
«Ապագայում նախատեսվում է այդ երկրների արժեքների միավորումը, դեռևս քննարկման փուլում է, սակայն այդ հարցերը լուծելի են: Լեհաստանի գործող արտգործնախարարն իր ելույթում հույս հայտնեց, որ Բրյուսելյան գագաթնաժողովին ԵՄ-ն կկարողանա հստակ հայտարարություն անել և խոստանալ, որ այս բոլոր երկրներն ունեն ԵՄ-ին միանալու հեռանկար»,-ասաց Կարոլինա Զբիտնևսկան:
«Եվրոպան առանց սահմանների» ուկրաինական հասարակական կազմակերպության ղեկավար Իրինա Սուշկոն էլ ասաց, որ չնայած այս դժվարություններին, որն այսօր ունի Ուկրաինան՝ առաջին հերթին Ռուսաստանի ագրեսիան Ուկրաինայի քաղաքացիների նկատմամբ, ամեն դեպքում Ուկրաինան հասավ առանձնահատուկ արդյունքների:
«Առանց ավելորդ անհամեստության կարելի է նշել եվրոպական ինտեգրացիայի երկու հաջողակ պատմություն: Այո, Մայդանից հետո ուկրաինացիների մեծամասնությունն ասաց, որ Եվրամիության արժեքները մեր արժեքներն են: Մենք ունեինք որոշում կայացնելու հնարավորություն, որը բերեց Ուկրաինայի այսօրվա առանձնահատուկ ձեռքբերումներին: Անխոս ոչ բոլոր ոլորտներում, բայց մենք այսօր կարող ենք խոսել այն մասին, որ Ուկրաինան ստացավ առանց վիզայի ռեժիմ Եվրամիության հետ, և այսօր կարելի է վստահորեն ասել, որ Հայաստանը նույնպես ունի այդպիսի հնարավորություն»,-ասաց Իրինա Սուշկոն: