Իրանը փակել է Իրաքյան Քուրդիստանի հետ ցամաքային սահմանը
Իրանի իշխանությունները որոշում են կայացրել փակել Իրաքյան Քուրդիստանի հետ ցամաքային սահմանը՝ այդ շրջանում անկախության հարցով հանրաքվեի անցկացման պատճառով: Այդ մասին հայտարարել է Իրանի ԱԳՆ ներկայացուցիչ Բահրամ Ղասեմին, գրում է interfax.ru-ն:
«Իրաքի կառավարության խնդրանքով մենք փակել ենք մեր օդային տարածքը և ցամաքային սահմանը»,- ասել է Ղասեմին:
Նա կրկին նշել է, որ Թեհրանում հանրաքվեն անօրինական են համարում:
Իրանը նախօրեին հայտարարել էր Իրաքի կենտրոնական կառավարության խնդրանքով ինքնավար շրջանի օդանավակայաններից չվերթները դադարեցնելու մասին:
Ավելի վաղ ԶԼՄ-ները հայտնել են, որ Թուրքիայի իշխանությունները փակել են թուրք-իրաքյան սահմանին գտնվող «Հաբուր» անցակետը:
Հիշեցնենք, որ այսօր՝ տեղի ժամանակով ժամը 08:00-ին, Իրաքյան Քուրդիստան ինքնավար շրջանում մեկնարկել է անկախության հարցով հանրաքվեն: Ամբողջ շրջանում, ներառյալ՝ վիճահարույց տարածքներում բացվել են ընտրատեղամասերը: Քուրդիստանի ընտրությունների և հանրաքվեի հարցով անկախ հանձնաժողովի համաձայն՝ հանրաքվեին մասնակցելու իրավունք ունի ավելի քան 5 միլիոն մարդ:
Իրաքյան Քուրդիստանի ղեկավար Մասուդ Բարզանին հայտարարել է, որ եթե «այո» քվեաթերթիկները հաղթեն, Իրաքյան Քուրդիստանի կառավարությունը Բաղդադի հետ լուրջ և կառուցողական երկխոսություն կսկսի ապագայում որպես երկու անկախ հարևան իրենց երկկողմ հարաբերությունների վերաբերյալ:
Անկախ Քուրդիստանը երկար սպասված երազանք է եղել ամբողջ աշխարհում ավելի քան 40 միլիոն քրդերի համար:
Ավելի վաղ հաղորդվել է, որ Թուրքիայի նախագահ Ռեջեփ Թայիփ Էրդողանը և Իրանի նախագահ Հասան Ռոհանին կիրակի հեռախոսազրույց են ունեցել, որի ժամանակ քննարկել են Իրաքյան Քուրդիստանի անկախության հանրաքվեի հարցը: Երկու առաջնորդներն էլ մտահոգություն են հայտնել առ այն, որ հանրաքվեի անցկացումը տարածաշրջանային քաոսի առիթ կդառնա: