Առավել քան դրական եմ համարում Կարեն Միրզոյանին Մասիս Մայիլյանով փոխարինելու որոշումը. Վահան Բադասյան
Արցախցի հրամանատար Վահան Բադասյանը առավել քան դրական է համարում Արցախցի Հանրապետության նախկին արտգործնախարար Կարեն Միրզոյանին ԱՀ նախագահի հատուկ հանձնարարություններով նախկին դեսպան Մասիս Մայիլյանով փոխարինելը:
«Եթե ինձ հարցնում եք, դրական է, դեռ մի բան էլ ավելի, որովհետև Կարեն Միրզոյանը միակ արտգործնախարարն էր, որ արտահայտվում էր շատ թույլ: Եթե հիշում եք՝ ես իմ պատգամավոր եղած ժամանակ պահանջել եմ նրա հրաժարականը , քանի որ նա France-24 հեռուստաընկերությանը տված հարցազրույցի ժամանակ ասել էր, որ տարածքային զիջումներ պետք է լինեն, ինչը համաձայնեցված չէր»,- նկատեց Վահան Բադասյանը՝ պատասխանելով հարցին, թե Սահմանադրական փոփոխությունների հետևանքով Արցախի կառավարության ցրումից հետո Միրզոյանի` արտգործնախարար չնշանակվելու հարցում դե՞ր է խաղացել Էդվարդ Նալբանդյանի հայտարարության ֆոնին նրա` արցախյան պաշտոնյաներից ամենակոշտ արտահայտվող լինելը:
Ինչ վերաբերում է Մասիս Մայիլյանի նշանակմանը, Բադասյանը դա դրական գնահատական գնահատեց՝ ասելով, որ վերջինս համակարգին ծանոթ է, եղել է փոխարտգործնախարար և միշտ հանդես է եկել հարցի կարգավորման վերաբերյալ մեկնաբանություններով:
ԼՂՀ նախկին պատգամավոր, ԼՂՀ ԱԺ արտաքին հարաբերությունների նախկին նախագահ Վահրամ Աթանեսյանը նույնպես դրական է գնահատում ու հերքում վարկածը, որ Մայիլյանը փոխարինում է Միրզոյանին, քանի որ վերջինս կոշտ հայտարարություն արեց, թե «Անվտանգության ապահովման մեխանիզմները, ծրագրերը մշակելիս մենք նկատի ունենք ներկայիս Արցախի Հանրապետության ողջ տարածքը»։
Վահրամ Աթանեսյանը նշեց, որ այդպես չի կարծում. «Մասիս Մայիլյանն էլ միշտ արտահայտվել է, նույնիսկ այն կտրվածքով, որ Մադրիդյան սկզբունքները Լեռնային Ղարաբաղի համար ընդունելի չեն»:
Հիշեցնենք, որ Արցախի Հանրապետության նախագահ Բակո Սահակյանը` ելնելով Արցախում կայացած Սահմանադրական փոփոխություններից, ըստ որոնց` Արցախը դարձել է ամբողջությամբ նախագահական կառավարմամբ երկիր, նոր նշանակումներ է արել, 5 նախարար փոխվել է, 1-ը փոխատեղվել, 5-ը վերանշանակվել, ևս 2 նախարարություն էլ ստեղծվել է:
Վահրամ Աթանեսյանը նշեց, թե դրական է գնահատում Արցախի կառավարությունում նոր դեմքերի ներգրավումը։
«Բազմաթիվ երիտասարդ կադրեր են նշանակվել, ովքեր նախկին տարիներին որոշակի փորձառություն ունեցել են, և ես սա բացարձակ դրական եմ գնահատում»,-ասաց նա: