Բրիջիտ Բարդոն 83 տարեկան է. դերասանուհու անցած ուղին՝ Big Picture-ի անդրադարձում (լուսանկարներ)
1934 թվականի սեպտեմբերի 28-ին Փարիզում ծնվել է Բրիջիտ Ան-Մարի Բարդոն: Նրա կյանքը լի է հակասություններով, սակայն նրա տաղանդը և անկրկնելի արտաքինն արժանի են հիացմունքի:
Հանրահայտ ֆրանսիացի դերասանուհին իր կյանքի ընթացքում հասցրել է լինել երգչուհի, պարուհի, դիզայներ, կենդանիների պաշտպան, սեքս-խորհրդանիշ, Ֆրանսիայի խորհրդանիշ և արվեստի բազմաթիվ ներկայացուցիչների մուսա ու ոգեշնչման աղբյուր՝ մինչ օրս շարունակելով հիացնել աշխարհին:
Big Picture-ն անդրադարձել է Բարդոյի կյանքի կարևոր իրադարձություններին և պատմել նրա հիմնական զբաղմունքների և տաղանդների մասին:
Պարուհի
Մոր ազդեցությամբ Բարդոն իր կրտսեր քրոջ հետ մանկուց զբաղվել է պարով: Չլինելով առաջադեմ աշակերտ դպրոցում, սակայն օժտված լինելով բնական ճկունությամբ և հմայքով՝ նա որոշել է կենտրոնանալ բալետային կարիերայի վրա: 1947 թվականին նա ընդունելության քննություն է հանձնել Պարի ազգային ակադեմիայում և դարձել ութ ընտրյալներից մեկը:
Մոդել
1949 թվականին 15-ամյա Բրիջիտը մասնակցել է նորաձևության ցուցադրության՝ մոր ծանոթի հրավերով: Նույն թվականին նա նկարահանվել է Jardin des Modes («Նորաձևության պարտեզ») ամսագրի համար: Ավելի ուշ նա հայտնվել է ELLE ամսագրի շապիկին, և նրան նկատել է սկսնակ ռեժիսոր Ռոժե Վադիմը:
Դերասանուհի
Առաջին անգամ Բարդոն ֆիլմում նկարահանվել է 1952 թվականին: Նա համաշխարհային ճանաչում է ձեռք բերել Ռոժե Վադիմի «Եվ Աստված ստեղծեց կնոջը» ֆիլմի շնորհիվ (1956 թվական), որում նա կատարել է գլխավոր հերոսուհու՝ անսանձ 18-ամյա Ժուլյետ Արդիի դերը:
Կենդանիների պաշտպան
1973 թվականին՝ 40-ամյակից քիչ առաջ, Բարդոն հայտարարել է կինոյում իր կարիերան ավարտելու մասին և կյանքը նվիրել կենդանիների իրավունքների պաշտպանությանը: 1986 թվականին նա կենդանիների պաշտպանության հարցերով զբաղվող հիմնադրամ է բացել և 3 միլիոն ֆրանկ վաստակել՝ հիմնադրամին աջակցելու նպատակով աճուրդում վաճառելով թանկարժեք զարդեր և անձնական իրեր:
Այժմ Բարդոն ապրում է իր առանձնատանը մի քանի հարյուր կենդանիների հետ:
«Շունը ցավ է պատճառում միայն այն ժամանակ, երբ մեռնում է», - ասել է նա:
Երգչուհի
Շոու բիզնեսում իր կարիերայի ընթացքում Բրիջիտը 80 երգ է ձայնագրել և ելույթ ունեցել տարբեր երաժշտական շոուներում: Նա մի քանի երգ է ձայնագրել իր սիրեցյալի՝ ֆրանսիացի երաժիշտ և պոետ Սերժ Գենսբուրի հետ:
Դիզայներ
2010 թվականին Lancel նորաձևության տան հետ Բրիջիտը ստեղծել է B.B. պայուսակը, որն արտացոլում է իր ճաշակը, կյանքը և կազմվածքը: Սա կանացիության և բնականության իսկական մարմնավորում է, ինչպես և Բրիջիտը, որն ամբողջ կյանքի ընթացքում ոչ մի պլաստիկ վիրահատություն չի արել:
Կրծքագեղձի քաղցկեղի հաղթող
Վերջերս Բարդոյի մոտ կրծքագեղձի քաղցկեղ է ախտորոշվել: Սկզբում նա հրաժարվել է բուժումից՝ համարելով, որ դա իր ճակատագիրն է: Սակայն նրա ընկերուհին՝ դերասանուհի Մարինա Վլադին, եկել է Սան Տրոպե և համոզել նրան սկսել բուժումը: Արդյունքում Բարդոն հաղթահարել է քաղցկեղը: