Քայլեր ենք ձեռնարկելու, որ առողջապահական ծառայություններ մատուցողները դուրս գան ՔԿՀ ենթակայությունից և լինեն անկախ. Դավիթ Հարությունյան
Կոռուպցիայի դեմ պայքարում անցած տարվա ընթացքում կատարվել են 7 կարևոր քայլեր, ինչպես նաև բարեփոխումներ են կատարվել քրեակատարողական հիմնարկներում և մշակվել ու կյանքի են կոչվել սահմանադրական փոփոխություններով պայմանավորված մի շարք օրենսդրական նախաձեռնություններ: Այս մասին այսօր ամփոփիչ ասուլիսին ասաց ՀՀ արդարադատության նախարար Դավիթ Հարությունյանը:
Ըստ նրա՝ այս տարվա ընթացքում կտարված քայլերից ամենակարևորը Կոռուպցիայի կանխարգելման հանձնաժողովի մասին օրենքի մշակումն է, որն ընդունվել է հունիս ամսին։
«Այս մարմնի նպատակները կարելի է առանձնացնել երեք հիմնական ուղղություններով: Առաջինը՝ անհամատեղելիության պահանջներն են բարձրաստիճան պաշտոնատար անձանց համար: Երկրորդ կարևորը հարցը՝ էթիկայի հարցերով որոշումներ կայացնելն է, և երրորդ կարևոր գործառույթը՝ մասնակցությունը ռազմավարության իրականացմանը»,- հայտնեց նախարարը:
Նրա խոսքով՝ թեև նախկինում իրականացվում էր պաշտոնատար անձանց հայտարարագրերին հետևելու գործընթացը, բայց հանձնաժողովին պատշաճ գործիքակազմ տրված չէր: Այս օրենքով տրվել է մեծ գործիքակազմ, և հանձնաժողովը հնարավորություն ունի ստանալ տվյալներ տարբեր հանրային ռեգիստրներից՝ ստուգելու համար՝ ճշգրիտ են հայտարարագրերը, թե ոչ: Եթե առկա են խնդիրներ, հանձնաժողովը կարող է բարձրաձայնել և իրականացնել համապատասխան քայլեր:
Դավիթ Հարությունյանի տեղեկացմամբ՝ ընդլայնվել է պաշտոնատար անձանց հայտարարագրերի ստուգման շրջանակը։
«Կան պաշտոններ, որոնք բարձրաստիճան չեն համարվում, բայց կան կոռուպցիոն ռիսկեր իրենց գործունեության ոլորտում: Այժմ ընդլայնվել է այն անձանց շրջանակը, ովքեր պետք է ներկայացնեն հայտարարագրեր: Հետզհետե անձանց շրջանակն ավելի է ընդլայնվելու»,- նշեց նա:
Բացի այս օրենքի ընդունումից, ԱՆ-ն կատարվել են մի շարք այլ քայլեր, որոնք նույնպես ուղղված են կոռուպցիայի դեմ պայքարի արդյունավետության բարձրացմանը:
Մասնավորապես, խոսքը՝ ապօրինի հարստացման քրեականացումն է և կանխիկ դրամով գործարքներ անելու սահմանափակումը բարձրաստիճան պաշտոնատար անձանց համար:
«Ազդարարի ինստիտուտի ներդնումը նույնպես կարևոր քայլ էր, երբ քաղաքացիները կարողանում են անանուն հաղորդակցվել իրավապահ մարմինների հետ: Այս ինստիտուտի մշակման համար հաշվի է առնվել այլ երկրների փորձը»,- ասաց նախարարը:
Այս տարվա ընթացքում նաև Արդարադատության նախարարության կողմից իրականացվող ծառայությունները էլեկտրոնային տարբերակով ավելի շատ են մատուցվել:
Կոռուպցիայի դեմ պայքարը ավելի բարձր մակարդակի է հասցվել, բայց բազում խնդիրներ կան քրեակատարողական ոլորտում: Հարությունյանի տեղեկացմամբ՝ Արմավիր քրեակատարողական հիմնարկի բացումը ինչ-որ չափով ծանրաբեռնվածությունը նվազեցրեց, բայց շատ խնդիրներ կան քրեակատարողական հաստատություններում բժշկական ծառայություններ մատուցելու հետ կապված:
«Մենք քայլեր ենք ձեռնարկելու, որ առողջապահական ծառայություններ մատուցողները դուրս գան քրեակատարողական հիմնարկի ենթակայությունից և լինեն անկախ: Բայց ինստիտուցիոնալ ռեֆորմները բավարար չեն, պետք է գործնական քայլեր արվեն»,- ասաց նախարարը:
Ինչ վերաբերում է նախարարության իրականացված օրենսդրական աշխատանքներին, Դավիթ Հարությունյանը նշեց, որ դա կարելի է բաժանել երկու մասի: Առաջին մասը վերաբերում է սահմանադրական փոփոխություններով պայմանավորված օրենքների ներդրմանը, իսկ երկրորդը՝ վերաբերում ՝ մարդու իրավունքների պաշտպանության բարձրացմանը: