Սպառազինությունների արդիականացման համար ՀՀ-ն վարկ կվերցնի Ռուսաստանից. Սերժ Սարգսյանը՝ «Ռոսիա 24»-ին (տեսանյութ)
Հայաստանի զինված ուժերը պետության կարևոր բաղադրիչներից մեկն է, որի խնդիրն է հայ ժողովրդի ինքնիշխանության և անվտանգության պաշտպանությունը: Այդ մասին Հայաստանի Հանրապետության նախագահ Սերժ Սարգսյանը հայտարարել է «Ռոսիա 24» հեռուստաալիքին տված հարցազրույցում:
«Մեր ԶՈՒ-ն վատ ապահովված չէ նյութատեխնիկական առումով, իր տրամադրության տակ ունի ժամանակակից սպառազինության լուրջ նմուշներ և համալրված է պրոֆեսիոնալ սպաներով: Բայց դա չի նշանակում, որ մեր զինված ուժերը չպետք է զարգանա՝ և՛ զորքերի կառավարման, և՛ սպառազինությունների արդիականացման առումով»,- ասել է Սերժ Սարգսյանը:
Հայաստանի նախագահը հավելել է, որ հենց արդիականացման համար էլ Հայաստանը խնդրել է ռուսական կողմին վարկ տրամադրել:
Ավելի վաղ հաղորդվել է, որ Սերժ Սարգսյանը «ՌԻԱ Նովոստի»-ի հետ զրույցում հայտարարել է, որ Մոսկվան մոտ ժամանակներս Երևան կմատակարարի զենքի խմբաքանակ՝ գործող պայմանագրի շրջանակում. 100 միլիոն դոլարի նոր, արդեն ստորագրված վարկային համաձայնագրի իրականացումը կսկսվի բոլոր միջպետական մակարդակներում հաստատվելուց հետո:
«Մինչև այս տարվա վերջ մենք կիրականացնենք դեռ նախորդ պայմանագիրը: Օրերս մենք սպասում ենք նոր մատակարարումներ, և մինչև տարվա վերջ մենք կփակենք նախորդ պայմանագրի հետ կապված բոլոր հարցերը»,- ասել է Սերժ Սարգսյանը: