ՊՊԾ գունդը զավթելու մեջ մեղադրվողներից 10-ը նոր դատավոր Մակյանին ինքնաբացարկի միջնորդություն չներկայացրեցին
Այսօր առաջին դատական նիստն է մեկնարկել ՊՊԾ գունդը զավթելու մեջ մեղադրվողների գործից անջատված երրորդ վարույթով` դատավոր Մեսրոպ Մակյանի նախագահությամբ: Գործով անցնում է 10 ամբաստանյալ՝ Պավել Մանուկյանը, Վարուժան Ավետիսյանը, Արայիկ Խանդոյանը, Մխիթար Ավետիսյանը, Գագիկ Եղիազարյանը, Արմեն Բիլյանը, Սմբատ Բարսեղյանը, Արեգ Կյուրեղյանը, Էդվարդ Գրիգորյանը, Սեդրակ Նազարյանը:
Առաջին նիստին քննարկվեց դատավորին ինքնաբացարկ հայտնելու հարցը, ում ՊՊԾ գունդը զավթելու մեջ մեղադրվողներն ինքնաբացարկի միջնորդություն չներկայացրեցին:
Ելույթով հանդես եկավ ամբաստանյալ Գագիկ Եղիազարյանը, ով դատավորին ասաց, որ իր քրոջը չեն համարել մերձավոր հարազատ և արգելել են տեսակցել իրեն:
Դատավորն ասաց, որ իր քննությամբ տեսակցության վերաբերյալ բոլոր միջնորդությունները բավարարվել են, իսկ եթե այդ հարցով այլ միջնորդություններ ներկայացվեն, դատարանը կքննի և որոշում կկայացնի:
«Ես չգիտեմ, որ դուք քույր ունեք, ձեր քույրը երեխա ունի, եթե ձեր կողմից միջնորդություն լինի դատարանը կքննարկի և որոշում կկայացնի»,-ասաց Մակյանը:
Պավել Մանուկյանը նույնպես հայտարարությամբ հանդես եկավ` ասելով, որ զենք է վերցրել դեռևս 1988-ին`երազելով, որ լավ երկիր ունենա ու արդար դատավորներ:
Դատարանն արձանագրեց, որ Պավել Մանուկյանը դատավորին ինքնաբացարկի միջնորդություն չներկայացրեց:
Վարուժան Ավետիսյանը ներկայացավ որպես ապստամբ և ասաց, որ բոլոր պետական մարմիններն ու պաշտոնատար անձինք գործում են պետականության դեմ.
«Պետականության դեմ են գործում նաև դատարանները, դատավորները, այդ թվում նաև Դուք հանցավոր համագործակցության անդամներ եք, և, բնականաբար, ես չեմ կարող ձեզ ընդունել որպես դատարան և վերաբերմունք հայտնել ձեր նկատմամբ` որպես դատավորի: Դուք դատավոր չեք, այլ հաշվեհարդար մեքենայի բաղադրիչ և սա հաշվեհարդար է, ոչ թե դատավարություն»:
Ելույթով հանդես եկավ նաև Արայիկ Խանդոյանը, ով պատմում էր, թե ինչպես է լսել, որ թուրքերը սպանել են իր նախնիներին:
Մեղադրող դատախազ Պետրոս Պետրոսյանն ընդհատեց` ասելով, որ ամբաստանյալի ելույթը դատավորին ինքնաբացարկ հայտնելու հետ որևէ առնչություն չունի, ինչին Խանդոյանն արձագանքեց. «Աղջիկ ջան, սուս մնա, երբ տղերքն են խոսում»:
Դատավորը Խանդոյանին հորդորեց խոսել ըստ էության, սակայն վերջինս շարունակեց: Պավլիկ Մանուկյանն ընդմիջում խնդրեց:
Դատական նիստն ընդմիջվեց և վերսկսվելուց հետո դատարանն անցավ ամբաստանյալների ինքնությունների ճշտման փուլին, այնուհետև անցավ դատախազներին ինքնաբացարկ հայտնելու հարցին: Ամբաստանյալներն ընդմիջում խնդրեցին: Դատական նիստն ընդմիջվեց 10 րոպեով:
Նշենք, որ 4 ամիս միայնակ քննելով բոլոր 32 ամբաստանյալների գործը, հոկտեմբերին դատավոր Արտուշ Գաբրիելյանը գործն անջատելու մասին որոշում էր կայացրել, որով իր վարույթում էր թողել միայն 11-ի գործը: Դատավորն ամբաստանյալներից յուրաքանչյուրի համար ընտրված խափանման միջոց կալանավորումները թողել էր անփոփոխ:
Հիշեցնենք, որ Արտուշ Գաբրիելյանին գրեթե յուրաքանչյուր դատական նիստի ժամանակ ամբաստանյալներն ու նրանց պաշտպանները ինքնաբացարկի միջնորդություն են ներկայացրել, որոնք մերժվել են: