Նոյեմբերի 1-ից հաց և միս մատակարարող մեքենաներից սանանձնագիր կպահանջվի. ՍԱՊԾ-ը 458 հաց տեղափոխողներից 356–ին է անձնագիր տվել
Նոյեմբերի 1-ից մայրաքաղաքի առևտրի իրացման վայրեր հաց և միս մատակարարող փոխադրամիջոցները պետք է ունենան սանիտարական անձնագրեր: Հոկտեմբերի 31-ի դրությամբ՝ ՀՀ ԳՆ սննդամթերքի անվտանգության պետական ծառայությունը սանիտարական անձնագիր է տրամադրել հաց-հացաբուլկեղեն տեղափոխող 356 (254-ը Երևան քաղաքում) և միս տեղափոխող՝ 94 (50-ը Երևան քաղաքում) տրանսպորտային միջոցի:
Այս մասին Tert.am-ի հետ զրույցում ասաց ՀՀ ԳՆ ՍԱՊԾ պետի մամուլի քարտուղար Նվարդ Առաքելյանը:
«Նոյեմբերի 1-ից հետո՝ նշված ոլորտների վրա նորմի տարածմանը և հայտատուների թվի ավելացմանը զուգահեռ, ՍԱՊԾ-ը կհրապարակի տրանսպորտային միջոցների թվի մասին լրացուցիչ օպերատիվ տեղեկատվություն. մեքենաների թիվն օրեցօր ավելանում է: Նկատենք, որ ՀՀ ԳՆ սննդամթերքի անվտանգության պետական ծառայության սննդի շղթայի օպերատորների բազայում այսօր գրանցված է հաց-հացաբուլկեղենի արտադրության ոլորտում գործունեություն ծավալող 642 տնտեսվարող, որոնցից 318-ն իրականացնում է հացի տեղափոխում՝ 458 տրանսպորտային միջոցով: ՍԱՊԾ վերահսկման դաշտում են լինելու սննդի շղթայում և ժամանակացույցով սահմանված ոլորտներում գործող բոլոր տնտեսվարողները»:
Նշենք, որ ԳՆ ՍԱՊԾ սննդամթերքի անվտանգության և որակի հսկողության տեսչության պետ Վահե Դանիելյանն ասել էր, որ եթե մինչև նոյեմբերի 1-ն այդ պահանջները չիրականացվեն, պետական վերահսկողության շրջանակներում սահմանափակվելու է տվյալ տրանսպորտային միջոցների շահագործումը, իսկ եթե կոպիտ անհամապատասխանություններ գտնվեն, նաև վարչական պատասխանատվության միջոցներ են կիրառելու։
Հարցին, թե հաշվի առնելով վերոնշյալը, այսօրվա դրությամբ ի՞նչ արդյունքներ են գրանցվել, ստուգումներ իրականացվե՞լ են, թե ոչ, խախտումներ գրանցվե՞լ են, կա՞ն անհատներ կամ ընկերություններ, որոնց գործունեությունը կասեցվե՞լ է, ՀՀ ԳՆ ՍԱՊԾ –ից պատասխանեցին, որ պետական վերահսկողության շրջանակներում արձանագրվել է մի քանի դեպք, երբ տնտեսվարողը փոխադրամիջոցի համար սահմանված ժամանակացույցին համապատասխան դեռ չի ստացել սանիտարական անձնագիր:
«Նրանց նկատմամբ հարուցված վարչական վարույթի շրջանակներում պարզվել է, որ մինչև վարույթի ավարտը սանանձնագրերի ձեռքբերման գործընթացը հասցվել է ավարտին, խախտումը վերացվել է: Նշենք, որ այս փուլում՝ նոյեմբերի 1-ից հետո, այստեղ մեծ անելիք ունեն իրացման ցանցի կամ արտադրության պատասխանատուները. նրանք պետք է հրաժարվեն սահմանված նորմերին չհամապատասխանող և սանիտարական անձնագիր չունեցող փոխադրամիջոցներով հացը կամ միսն ընդունել, այլապես՝ մատակարարի հետ միասին պատասխանատվության կենթարկվեն»:
ՀՀ ԳՆ ՍԱՊԾ –ից հայտնեցին, որ հետևողական են լինելու սանիտարական անձնագրեր ունենալու պահանջի կատարման նկատմամբ և օրենքով սահմանված կարգով պատասխանատվության միջոցներ են կիրառելու՝ նորմը շրջանցելու դեպքերը նվազեցնելու և բացառելու նպատակով: