Զբոսաշրջիկների թվի աճին նպաստել է նաև ՌԴ քաղաքացիներին ներքին անձնագրերով մուտքի իրավունքի տրամադրման մասին որոշումը. Սերժ Սարգսյան
Ներքին անձնագրերով ՌԴ քաղաքացիների մուտքը Հայաստան թույլ տալու մասին ՀՀ կառավարության որոշումն ազդել է զբոսաշրջային հոսքի վրա: Այդ մասին հայտարարել է Հայաստանի Հանրապետության նախագահ Սերժ Սարգսյանը «Ռոսիյսկայա գազետա»-ին տված հարցազրույցում:
Սերժ Սարգսյանը նշել է, որ Հայաստանում հանգիստն անցկացնել ցանկացող ռուս զբոսաշրջիկների թիվն ամեն տարի աճում է: Վիճակագրության համաձայն՝ այս տարվա հունվար-սեպտեմբերին Ռուսաստանի քաղաքացիների այցելությունների թիվն աճել է մոտ 32 տոկոսով՝ անցած տարվա նույն ժամանակահատվածի համեմատ: Այժմ այդ թիվը մոտ է կես միլիոնին՝ 447.840 մարդ:
«Հայաստանի նկատմամբ ռուսների հետաքրքրվածության աճին նպաստում է մի քանի գործոն: Եվ ամենագլխավորը, անկասկած, փոխըմբռնման բարձր մակարդակն է, որի ակունքները պատմության խորքերից են գալիս: Հայաստանի և Ռուսաստանի քաղաքացիների միջև շատ հեշտ, բնական, ես կասեի՝ մտերմաբար շարունակում են զարգանալ զուտ մարդկային, ընկերական հարաբերությունները»,- ասել է Սերժ Սարգսյանը:
Հայաստանի նախագահը նշել է, որ ռուս զբոսաշրջիկների թվի աճին նաև նպաստել է Ռուսաստանի քաղաքացիներին ներքին անձնագրերով մուտքի իրավունքի տրամադրման մասին Հայաստանի կառավարության որոշումը: Տարեսկզբից այդ հնարավորությունից արդեն օգտվել է ՌԴ ավելի քան 50 հազար քաղաքացի, այսինքն՝ Ռուսաստանից զբոսաշրջային հոսքի 10 տոկոսը:
Խոսելով զբոսաշրջության զարգացման հեռանկարներից՝ Սերժ Սարգսյանը նշել է, որ դիտվում է Հայաստան, այդ թվում նաև Ռուսաստանից զբոսաշրջային այցերի աճի կայուն միտում: Նրա խոսքով՝ Հայաստանի տեսարժան վայրերը և պատմամշակութային ժառանգության հուշարձաններն արդեն վաղուց գրավել են ռուսների ուշադրությունը:
«Բայց պատճառը միայն տնտեսության մեջ չէ, միայն բիզնեսում չէ: Կարևոր նշանակություն ունի նաև այն, որ Հայաստանում աճում է ռուսերենին կատարյալ տիրապետելու հարցում հետաքրքրված անձանց թիվը: Որովհետև Ռուսաստանից մեծ զբոսաշրջային հոսքն ինքնին նպաստում է և՛ տաքսու վարորդների, և՛ մատուցողների, և՛ զբոսաշրջիկների համար ծառայությունների ոլորտի հետ կապված այլ ծառայությունների ներկայացուցիչների կողմից ռուսաց լեզվի իմացությանը: Դա շատ կարևոր է: Լավ է, երբ լեզվի տարածումը ոչ թե կարգախոս է, այլ քաղաքացիների մոտիվացված որոշում»,- ասել է Սերժ Սարգսյանը: