2018թ.–ի բյուջեն կայունացման բյուջե է և նպատակ ունի երկարաժամկետ աճ ապահովել. Էդուարդ Շարմազանով
Կառավարության կողմից ԱԺ–ին ներկայացված 2018 բյուջեի նախագիծն իրատեսական է, կայունացման բյուջե է և նպատակ երկարաժամկետ աճ ապահովելու։
Այդ մասին ՀՀԿ ԳՄ նիստից հետո լրագրողների հետ զրույցում ասաց ՀՀԿ խոսնակ, ԱԺ փոխնախագահ Էդուարդ Շարմազանովը։
«2018 թվականի բյուջեն հնարավորություն է տալիս 4.5-5 տոկոս աճ ապահովել, ներդրումներ ավելացնել և հնարավորություն տալ ապագայում ավելի երկարաժամկետ տնտեսական աճ և ներդրումային միջավայր ապահովել ՀՀ–ի համար»,–ասաց Էդուարդ Շարմազանովը։
Նա նշեց, որ դրական են գնահատում քննարկումները խորհրդարանում և գտնում են, որ կառավարությունը ներկայացրել է իրատեսական և կայունացման բյուջե։
«Այն ամենառեալն է ՀՀ–ի համար։ Մեր ցանկությունները, բնականաբար, ավելի մեծ են, քան 4.5-5 տոկոս տնտեսական աճը։ Բայց սա ռեալ բյուջե է»,–ասաց Շարմազանովը։
Նա նշեց, որ ընդդիմության քննադատությունը բնական են համարում, սակայն ավելի ցանկալի կլիներ, որ ՀՀ քաղաքական ներկապնակում հայտնվեր ուժ, որը քննադատությունից զատ կներկայացներ նաև այլընտրանքային բյուջեի նախագիծ։