Հայտնի է՝ որքան է արժեցել Թուրքիայի կողմից ռուսական C-400-ի գնման վերաբերյալ գործարքը
Թուրքիայի և Ռուսաստանի միջև ռուսական C-400 զենիթահրթիռային համակարգերի գնման վերաբերյալ գործարքն արժեցել է ավելի քան 2 մլրդ դոլար։ Այս մասին հայտարարել է «Ռոստեխ» պետական կորպորացիայի գլխավոր տնօրեն Սերգեյ Չեմեզովը:
Ինչպես գրում է Sputnik-ի թուրքական ծառայությունը, ռուս պաշտոնյան, սակայն, խուսափել է հստակ թվեր նշել:
Դեռևս սեպտեմբերի 12-ին Թուրքիայի նախագահ Ռեջեփ Թայիփ Էրդողանը հայտարարել էր, որ երկու կողմերը ստորագրել են C-400-ի գնման մասին պայմանագիրը:
Վերջերս ՆԱՏՕ-ի գլխավոր քարտուղար Յենս Սթոլթենբերգը, մեկնաբանելով Թուրքիայի և Ռուսաստանի միջև C-400 զենիթահրթիռային համալիրների գնման գործարքը, նշել էր, որ այժմ որևէ լարվածություն չկա ռուս-թուրքական բանակցությունների պատճառով:
Օրեր առաջ էլ լրագրողների հետ հանդիպմանը ՆԱՏՕ-ի ռազմական կոմիտեի ղեկավար, չեխ գեներալ Պյոտր Պավելը հայտարարել էր, որ ՆԱՏՕ-ն դեմ է, որ Անկարան Մոսկվայից С-400 զենիթահրթիռային համակարգեր ձեռք բերի հիմնականում անվտանգության նկատառումներով, այլ ոչ Ռուսաստանի և Արևմուտքի ռազմական տեխնիկայի տեխնիկական անհամատեղելիության պատճառով: