ԱԶԲ-ն $40 մլն բյուջետային աջակցության վարկ կտրամադրի ՀՀ-ին. կառավարությունը հավանության արժանացրեց ծրագիրը
Կառավարության այսօրվա նիստին ընթացքում ՀՀ ֆինանսների նախարար Վարդան Արամյանը գործադիր մարմնի համաձայնությանը ներկայացրեց Հայաստանի Հանրապետության և Ասիական զարգացման բանկի միջև «Հանրային արդյունավետության և ֆինանսական շուկաների ծրագիր. ենթածրագիր 1» վարկային համաձայնագրի նախագիծը:
«Ըստ նախագծի՝ համաձայնագրով նախատեսվում է Հայաստանին տրամադրել 40 մլն ԱՄՆ դոլարի բյուջետային աջակցության վարկ: Բյուջետային աջակցության վարկավորման մեխանիզմը, ի տարբերություն նպատակային ծրագրերի, հնարավորություն է տալիս ֆինանսավորելու բյուջեի կարևորագույն ծախսային կատեգորիաները»,-ասաց Արամյանը:
Նախարարը նշեց, որ վարկը տրման պայմանները բավականին լավն են, վարկը տրվում է 15 տարի մարման ժամկետով, որից 3 տարին՝ արտոնյալ:
Ծրագրի իրականացման արդյունքում նախատեսվում է հզորացնել պետական պարտքի և ֆիսկալ ռիսկի կառավարումը: Նախագծում նշվում է, որ ծրագիրը բաղկացած է 2 ենթածրագրից, և այսօրվա համաձայնագիրը վերաբերում է առաջին ենթածրագրին: Ծրագրի ընդհանուր արժեքը 90մլն ԱՄՆ դոլար է, որի 2-րդ մասնաբաժինը (50 մլն ԱՄՆ դոլար) հասանելի կդառնա 2018թ.: