«Ահաբեկչության դեմ պայքարի մասին» նախագծում փոփոխություններ կարվեն՝ պայմանավորված նախագահի լիազորությունների կրճատմամբ
Կառավարությունն այսօր հավանության արժանացրեց «Ահաբեկչության դեմ պայքարի մասին» ՀՀ օրենքում փոփոխություններ կատարելու մասին» ՀՀ օրենքի նախագծի վերաբերյալ կառավարության օրենսդրական նախաձեռնությանը:
Նախագիծը կառավարության հավանությանը ներկայացրեց ՀՀ արդարադատության նախարար Դավիթ Հարությունյանը, ով ասաց, որ հարցը շատ սկզբունքային ու բովանդակային չէ. «Փոփոխությունը պայմանավորված է այն հանգամանքով, որ նախագահին վերապահված էին մի շարք լիազորություններ համակարգելու և անմիջականորեն ղեկավարելու ահաբեկչության դեմ պայքարի մի շարք մարմինների աշխատանքներ։ Բայց հաշվի առնելով, որ նոր սահմանադրությամբ նախագահը նման լիազորությամբ օժտված չի լինելու մենք կատարում ենք համապատասխան փոփոխություններ»:
Նշենք, որ նախագծով առաջակվող փոփոխություններից էին «Հայաստանի Հանրապետության կառավարության լիազորած պետական մարմինները» բառերը փոխարինել «պետական կառավարման համակարգի մարմինները» բառերով, «հանրապետական գործադիր» բառերը փոխարինել «պետական կառավարման համակարգի» բառերով, «գործադիր իշխանության հանրապետական» բառերը փոխարինել «պետական կառավարման համակարգի» բառերով և այլն:
Կառավարության օրենսդրական նախաձեռնությունը սահմանված կարգով կներկայացվի Ազգային ժողով: