Տոմ Տիկվերը նշանակվել է Բեռլինալեի ժյուրիի նախագահ
Գերմանացի ռեժիսոր Տոմ Տիկվերը նշանակվել է Բեռլինի միջազգային կինոփառատոնի ժյուրիի նախագահ: Այս մասին հայտնում է Variety-ն:
Տիկվերը հայտնի է «Պարֆյումեր. մի մարդասպանի պատմություն» (2006), «Վազիր Լոլա, վազիր» (1998) ֆիլմերի և «Բաբելոն-Բեռլին» (2017) սերիալի շնորհիվ:
Հայտնի է, որ տարբեր թվականների Բեռլինալեում ցուցադրվել է Տիկվերի 6 ֆիլմ: Ռեժիսորի խոսքով՝ այս փառատոնն իր համար միշտ եղել է սիրելի և տնային ու միշտ աջակցություն է ցուցաբերել իրեն:
Ավելի վաղ Բեռլինի կինոփառատոնի ժյուրիի նախագահներ են եղել դերասանուհի Մերիլ Սթրիփը, ռեժիսոր Վերներ Հերցոգը:
Նշվում է, որ Բեռլինի 68-րդ կինոփառատոնը կանցկացվի 2018 թվականի փետրվարի 15-25-ը: