Կարծում եմ՝ Երևանի տրանսպորտային նոր համակարգի ներդնումից հետո ուղեվարձը 200 դրամ չի դառնա. Հ. Նավասարդյան
Այսօրվա դրությամբ ոչ ոք չի կարող ասել, թե տրանսպորտի գինը որքան է կազմելու, բայց կարծում եմ՝ տրանսպորտային նոր համակարգի ներդնումից հետո ուղեվարձը 200 դրամ չի դառնա: Այս մասին Tert.am-ի հետ զրույցում ասաց Երևանի քաղաքապետարանի տրանսպորտի վարչության պետ Հենրիկ Նավասարդյանը:
«Ամեն կերպ փորձելու ենք, որ նոր տրանսպորտային համակարգի ներդրման դեպքում սակագինը չբարձրանա: Խնդիրն ի սկզբանե այդպես էլ դրված է եղել»,- նշեց նա:
Նախօրեին Երևանի փոխքաղաքապետ Վահե Նիկոյանը «Ազատություն» ռադիոկայանի հետ հարցազրույցում հայտարարել էր, որ Երևանում տրանսպորտով մեկանգամյա ուղևորությունը որոշ խավի համար կարող է արժենալ 200 դրամ:
«Վահե Նիկոյանը չի շեշտել, որ տրանսպորտի գինը 200 դրամ է դառնալու, նա տարբեր բաների մասին է խոսել, և ասել է, որ պետք է վերջնական հաշվարկվի ամեն ինչ: Նա նույնիսկ ասել է, որ մենք միասին ենք սակագինը հաշվարկելու, այնպես չէ, որ Վահե Նիկոյանն ասել է ուղեվարձը 200 դրամ է դառնալու»,- ընդգծեց Հենրիկ Իգիթյանը:
Երևանի քաղաքապետարանը տրանսպորտային նոր համակարգ ներդնելու նպատակով 2016 թվականի դեկտեմբերին բրիտանական խորհրդատու կազմակերպությանը պատվիրել էր հետազոտություններ անցկացնել և մշակել մայրաքաղաքային համապատասխան նոր երթուղային ցանց: Միայն օրերս խորհրդատուն Երևանի քաղաքապետարանին է ներկայացրել Երևանի երթուղային ցանցի առաջարկը։
Երևանի քաղաքապետարանի տրանսպորտի վարչության պետի խոսքով՝ առաջարկի վերաբերյալ դեռևս քննարկումներ չեն եղել, և նա տեղյակ էլ չէ, թե երբ է նախատեսվում սկսել քննարկումները: Հենրիկ Նավասարդյանի տեղեկացմամբ՝ Երևանի տրանսպորտային ոլորտի բարեփոխումները համակարգում է Վահե Նիկոյանը:
«Իհարկե, քննարկումներ լինելու են ոչ միայն տրանսպորտի վարչության, այլև հանրության հետ: Ամեն ինչ բաց է լինելու և հանրությունը տեսնելու է՝ ինչ է կատարվում»,- հայտնեց պաշտոնյան: