Ո՞վ ասաց, որ գիտությամբ զբաղվելու են միայն տարկետման իրավունք ունեցողները. բա աղջիկնե՞րը, բա զինծառայություն անցած մարդի՞կ. Ա. Սիմոնյան
Այսօր ռեկտորատի մեծամասնությունը երկու դեմ ու մեկ ձեռնպահ ձայնով հավանություն տվեց «Զինապարտության» մասին օրենքի նախագծին, բայց, միևնույն ժամանակ, նախագծի երկրորդ ընթերցմամբ քննարկման համար առաջարկներ ունենք ներկայացնելու, թերևս ՊՆ կուղարկենք կամ մեր նախարարություն, որ ուղարկեն Պաշտպանության նախարարություն: Այս մասին ասաց Երևանի պետական համալսարանի ռեկտոր Արամ Սիմոնյանը լրագրողների հետ զրույցում:
«Առաջարկը հետևյալն է՝ տաղանդավոր և բարձր առաջադիմություն ունեցող ուսանողների համար ծառայության ընթացքում պետք է ստեղծվեն որոշակի պայմաններ, որ նրանք զբաղվեն գիտությամբ: Կամ, եթե նա տաղանդավոր ջութակահար է, զբաղվի երաժշտությամբ, ինչպես դա ընդունված է, օրինակ՝ Իսրայելում: Մենք հատկապես շեշտել ենք արտակարգ առաջադիմություն ունեցող և տաղանդավոր ուսանողների, միջազգային օլիմպիական մեդալակիրների հարցը»,-տեղեկացրեց ԵՊՀ ռեկտորը:
Իսկ ինչ վերաբերում է դասադուլին, Արամ Սիմոնյանն ասաց, որ դասադուլը դատապարտող որևէ հայտարարություն իրենք չեն կարող անել, իրենց ուսանողների մասին է խոսքը, երիտասարդների մասին:
«Մեր խնդիրն է՝ հորդորել ուսանողներին վերադառնալ լսարան, նրանք մեր ուսանողների մեծամասնությունը չեն, բայց միևնույն է՝ մեր ուսանողներն են, և մենք կարծում ենք, որ այս ճանապարհով խնդիրներ բարձրաձայնելն արդյունավետ չէ: Նրանք կարող են իրենց բողոքը բարձրացնել տարբեր քննարկումների միջոցով, որն իրենց առաջարկվել է, հիմա էլ երևի կառաջարկվի: Նաև կարծում ենք, որ դասերը խանգարելը կամ դասերի ընթացքը, կրթության ընթացքը խաթարելը չի բխում ոչ մեկի շահերից»,-ասաց նա։
Պատասխանելով այն հարցին, թե ճի՞շտ են արդյոք այն տեղեկությունները, որ դասախոսների և ուսանողների վրա ճնշում է գործադրվել՝ ԵՊՀ ռեկտորն ասաց. «Ես՝ որպես համալսարանի ռեկտոր, ձեզ պաշտոնապես ասում եմ, որ որևէ մեկի նկատմամբ, լինի ուսանող, աշխատող, դասախոս, ո՛չ որևէ ճնշում է գործադրվել, ո՛չ սաստել ենք, ո՛չ սպառնացել, չի եղել և չի կարող լինել նման բան: Համալսարանն ազատ հարթակ է՝ կարծիք հայտնելու համար: Դասախոսներին հորդորել ենք միայն մի բան՝ ուսանողներին բացատրել մի բան, որ դասադուլը ճանապարհ չէ խնդիրներ լուծելու համար»:
Արամ Սիմոնյանը նշեց, որ իրեն տխրեցնում է այն, որ ԵՊՀ-ի նախկին կամ ներկա որոշ դասախոսներ իրենց թույլ են տալիս համալսարանի հասցեին վիրավորական արտահայտություններ թույլ տալ:
«Ես համարում եմ, որ ԵՊՀ-ն մի օջախ է, որ մենք հպարտանալու իրավունք և հնարավորություն ունենք: Այստեղ կրթություն ստացող մարդու համար այդ արարքը նախ վիրավորում է իրեն, հետո համալսարանին»,-ասաց նա։
Խոսելով տարկետման սահմանափակումների հետևանքով գիտության կրած ազդեցությունների մասին՝ ռեկտորն ասաց, որ կան մտահոգություններ, հատկապես բնագիտական թևի մասով: Նրա գնահատմամբ՝ այնտեղ որոշակի դժվարություններ լինելու են այն իմաստով, որ բակալավրիատն ավարտելուց հետո բանակ գնալու դեպքում տղաները վերադառնալուց անմիջապես հետո գուցե չուզեն շարունակել կրթությունը:
«Ամեն դեպքում, ես համարում եմ, որ յուրաքանչյուր երիտասարդի համար ոչ միայն պարտք է, այլև խիստ ցանկալի է, որ նա բանակի բովով անցնի, որովհետև բանակում տղան դառնում է տղամարդ, իսկ մեզ տղամարդիկ շատ են պետք: Ասպիրանտներ էլ են պետք, գիտնականներ էլ: Ինքս երկու գիտական խորհրդի անդամ եմ եղել և շատ եմ տեսել, որ մարդիկ գալիս են դիսերտացիա պաշտպանելու, որ չծառայեն բանակում, շատ են նման դեպքերը, ես ձեզ հավատացնում եմ: Եվ հետո ո՞վ ասաց, որ գիտությամբ զբաղվելու են միայն նրանք, ովքեր ունեն տարկետման իրավունք, բա աղջիկները չե՞ն զբաղվում գիտությամբ, բա մարտական ուղի անցած մարդիկ, կամ զինվորական ծառայություն անցած մարդիկ չե՞ն զբաղվում գիտությամբ»,-ասաց Արամ Սիմոնյանը: