Միայն իրաքցի քրդերի չէ, ամբողջ աշխարհի քրդերի ոգին է ընկած. Քիրքուքի գործողության ականատես
Իրաքյան Քիրքուքում հոկտեմբերի 16-ին տեղի ունեցած ռազմական գործողության ականատեսներից մեկը լրատվամիջոցներին պատմել է այդ օրն իր վերապարածների մասին. նա նշել է, որ ի սկզբանե, երբ իրաքյան ուժերը տիրեցին Քիրքուքին, իրենք չգիտեին, թե դա ինչով կավարտվի, սակայն այժմ ամեն բան ավելի հանդարտ է, գրում է gazeteduvar.com.tr կայքը:
«Սկզբում Թուրքիայի հետ սահմանին մեծ իրարանցում եղավ, մենք չգիտեինք՝ եթե Իրաքի բանակը տիրի Քիրքուքին մեզ համար խնդիր կլինի՞, թե՞ ոչ, սակայն այժմ ամեն բան հանդարտ է»,- պատմել է կայքի քուրդ զրուցակից Յադինը, ով նույն օրը հասցրել է փախչել քաղաքից:
Նա նշել է, որ Քիրքուքի կորուստը հոգեբանական ծանր ազդեցություն է ունեցել աշխարհի բոլոր քրդերի վրա:
«Միայն իրաքցի քրդերի չէ, ամբողջ աշխարհի քրդերի ոգին է ընկած, քաղաքական գործիչները դա չեն տեսնում, շատ ափսոս», - շարունակել է Յադինը, ով հրաժարվել է նշել իր ազգանունն անվտանգության նկատառումներով:
Հիշեցնենք, որ հոկտեմբերի 16-ին Իրաքի ուժերը սկսել են երկրի հյուսիսում գտնվող թուրքմեններով, արաբներով և քրդերով բնակեցված Քիրքուք շրջանի վրա գրոհը, որն Իրաքյան Քրդստանի ու Իրաքի միջև վիճելի տարածքներից մեկն է համարվում: Կարճ ժամանակ անց իրաքյան բանակին հաջողվել է վերահսկողություն սահմանել Քիրքուքի օդանավակայանի և կարևոր նավթահանքերի օբյեկտների նկատմամբ, իսկ քրդական «փեշմերգա»-ն զանգվածայնորեն նահանջել է զբաղեցրած դիրքերից:
Քիրքուքը պաշտոնապես Իրաքյան Քրդստանի մաս չի կազմել, սակայն տեղի քրդերը մասնակցել են անկախության հանրաքվեին:
Իրաքի հյուսիսում գտնվող Իրաքյան Քուրդիստան ինքնավարությունը սեպտեմբերի 25-ին անկախության հանրաքվե է անցկացրել, որի ժամանակ անկախության օգտին է քվեարկել 92.7 տոկոսը (2,86 մլն մարդ):