Չէի ասի՝ ուսանողների ակցիան ուղղորդված է, բայց կազմակերպիչները կարծես ինչ-որ կուսակցության անդամներ են. ՀՊՏՀ ուսխորհրդի նախագահ

Անձամբ չեմ ճանաչում ուսանողական բողոքի ակցիայի կազմակերպիչներին, բայց կարծես թե, նրանք բոլորը ինչ-որ կուսակցության անդամներ են: Այս մասին Tert.am-ի հետ զրույցում ասաց Հայաստանի պետական տնտեսագիտական համալսարանի (ՀՊՏՀ) ուսխորհրդի նախագահ Հովհաննես Հարությունյանը: «Եկեք սպասենք, իմ կարծիքով՝ եթե շարունակվի բողոքի ակցիան առաջիկայում կերևա այն քաղաքական է, թե ոչ»,- ընդգծեց նա: Ինչ վերաբերում է ՀՀԿ-ական պատգամավոր Կարեն Ավագյանի հայտարարությանը ՀՊՏՀ ուսխորհրդի նախագահը նշեց, որ հանրապետական լինել-չլինելը ուսանողության համար նշանակություն չունի: Հիշեցնենք, որ արդեն երեք օր է ԵՊՀ շենքի դիմաց ուսանողները բողոքի ակցիա են կազմակերպել՝ բողոքելով «Զինվորական ծառայության և զինծառայողի կարգավիճակի մասին» օրենքի փոփոխությամբ՝ տարկետման իրավունքի վերացման դեմ:

- Պարոն Հարությունյան, հիմնականում Երևանի պետական համալսարանի ուսանողներն են բողոքի ակցիայի կազմակերպիչները: ՀՊՏՀ-ի ուսանողները միացել են ցույցերին կամ ցանկանում են միանալ:

- Մեր բուհում այս օրերին ընթանում են միջանկյալ ստուգումները, քննաշրջան է, հիմնականում ուսանողները դրանով են զբաղված: Ես չեմ նկատել, որ մեր ուսանողները միանան կամ այդ թեմայի հետ կապ ունենան:  Մեկ-երկու հոգի կարող է միացել են, բայց ընդհանուր առմամբ բուհից հոսք չի եղել:

- ԱԺ «Հայաստանի Հանրապետական կուսակցություն» խմբակցության պատգամավոր, Հայաստանի երիտասարդական հիմնադրամի նախագահ Կարեն Ավագյանը հայտարարել է, որ ՀՀԿ անդամ ուսանողները չեն մասնակցում այս գործընթացներին: Տնտեսագիտական համալսարանում շա՞տ են ՀՀԿ-ականները, որ բողոքի ակցիային չեն միանում:

- Ուսանողության մասով կապ չունի հանրապետական և ոչ հանրապետական: Ես Ձեզ հայտնել եմ՝ մեր ուսանողները միանում են, թե ոչ: Հանրապետական լինել–չլինելը ուսանողության մասով նշանակություն չունի: Իսկ Կարեն Ավագյանը հայտնել է կուսակցության երիտասարդական կազմակերպության դիրքորոշումը: Մեկը մյուսի հետ կապ չունեն:

- ԵՊՀ ուսանողները բողոքի ակցիայի ընթացքում տարբեր համալսարաններ են գնում, միանալու կոչեր են հնչեցնում և շատ դեպքերում բուհերի դռները փակ են լինում: Նաև համացանցում լուսանկար էր հրապարակվել, որ ՀՊՏՀ-ի դռները փակ են:

- Դռները երբեք չեն փակվել մեր բուհում: Լուսանկար հրապարակվել է բողոքի ակցիայի կազմակերպիչների կողմից, թե մեր բուհի դարպասները փակ են եղել: Գրված էր՝ ՀՊՏՀ-ում դարպասները փակ են, բայց մեզ մոտ կարգն այդպես է: Դարպասները միշտ փակ են լինում, իսկ դարպասները կողքին կա դուռ, որը միշտ բաց է և ուսանողները հանգիստ ելումուտ են անում: Դարպասները մեքենաների մուտքի ու ելքի համար են, դարպասները բացվում են այն ժամանակ, երբ մեքենա պետք է մտնի կամ դուրս գա:

- Արդեն երեք օր է ուսանողները դասադուլ են հայտարարել, պայքարի այս ձևը Ձեզ համար ընդունելի՞ է:

- Դասադուլներին դեմ եմ, հատկապես, եթե գիտության զարգացման հետ է կապված: Դասադուլ անելով իմ կարծիքով ընդամենը խափանվում է կրթական պրոցեսը: Թեկուզ հենց մեր բուհի կողքով հենց անցնում են, արդեն երեք անգամ է մեր բուհի մոտով անցնում են և ընդամենը աղմուկ ու ինչ-որ կոչեր են, որը միայն խանգարում է ուսումնական պրոցեսին: Եթե ինչ-որ խնդիր կա և ուսանողներն ուզում են պայքարեն դրա դեմ, ապա այդ պայքարը թող անցկացնեն դասերից հետո: Ես դեմ եմ ուսումնական պրոցեսին խանգարող այս պայքարին:

- Ձեր կարծիքով՝ ԵՊՀ մի խումբ ուսանողների պայքարն արդարացի է, թե ուղղորդված:

- Անձամբ չեմ ճանաչում կազմակերպիչներին, բայց կարծես թե, նրանք բոլորը ինչ-որ կուսակցության անդամներ են: Եկեք ես չասեմ, որ ուղղորդված է ինչ-որ քաղաքական ուժի կողմից, որովհետև այդ քաղաքական ուժերի կողմից դեռևս հայտարարություն չի եղել: Դեռևս ԵՊՀ ուսանողների կողմից դասադուլ է կազմակերպվում:

- Քաղաքական պայքարի նշաններ տեսնո՞ւմ եք, կվերածվի սա քաղաքական պայքարի:

- Եկեք սպասենք, իմ կարծիքով՝ առաջիկայում ամեն ինչ կերևա, եթե շարունակվի բողոքի ակցիան:

- Իսկ համալսարանում տրամադրություններն ինչպիսի՞ն են, ինչպես են վերաբերվում տարկետման վերացման դրույթին:

- Անձնապես բոլորի հետ չեմ խոսել, վստահ եմ, որ կլինեն ուսանողներ, ովքեր դեմ են տարկետման իրավունքի վերացմանը, բայց ընդհանուր առմամբ՝ մեծամասնությունը կողմ է օրենքի փոփոխությանը: Եթե դեմ լինեին մեր բուհի մոտով անցնող ակցիայի մասնակիցներին կմիանային: Դռներ չի փակվել և ոչ ոք իրենց չի արգելել: Օրենքի փոփոխության հետ կապված մեր համալսարանում բազմիցս քննարկումներ եղել են և ասեմ, որ այդպես դեմ մարդիկ չեն եղել: Եթե իրականում օրենքը մանրամասն ուսումնասիրեն, ակցիայի մասնակիցներն այնպես չեն խոսի, ինչպես այսօր:

- Օրենքի փոփոխության վերաբերյալ Ձեր անձնական կարծիքն ինչպիսի՞ն է:

- Ես ինքս ծառայել եմ զինված ուժերում, ծառայության մեկնելու տարիքս լրանալուն պես գնացել եմ ծառայության, վերադարձել եմ և շարունակելու եմ իմ ուսումը: Ծառայությունից հետո ուսումը շարունակելու հետ կապված ոչ մի խնդիր չեմ նկատել, իմ անձնական օրինակով եմ ասում, ավելին՝ նոր էնտուզիազմով եմ շարունակել ուսումս և ավելի հասուն մտքով եմ մոտեցել մասնագիտությանս: