Հուսով եմ՝ ԵՄ-ում հասկանում են, որ Ալիևին պետք է տեղեկանք՝ պատերազմի գործողություններն արդարացնելու համար. Ս. Սաֆարյան` ԱլԳ հռչակագրի մասին
Հայաստան-Եվրամիություն համագործակցության մասին համաձայնագիրը, որը նախատեսվում է ստորագրել վաղը՝ Բրյուսելում կայանալիք Արևելյան գործընկերության գագաթաժողովի ժամանակ, մեծ կարևորություն ունի Հայաստանի համար: Թեև 90 տոկոսը կապված է լինելու դրա իրականացումից: Այս մասին փաստաթղթի ստորագրումից մեկ օր առաջ Ֆրիդրիխ Նաումանիի ու Գլոբալիզացիայի և տարածաշրջանային համագործակցության վերլուծական կենտրոնի կողմից կազմակերպված քննարկման ժամանակ հայտարարեց քաղաքագետ Ստեփան Սաֆարյանը:
«Ի տարբերություն 2013թ.-ի, երբ համաձայնագիրը հրապարակված չէր, փորձագետները, քաղաքացիական հասարկությունը չէին կարող պաշտպանել մի բանից, որից տեղյակ չէին, այժմ մենք ունենք մի փաստաթուղթ, որը համարվում է Հայաստանի արդիականացման հենք կամ ծրագիր: Շատերը ակնկալում էին, որ փստաթուղթը 400 էջ չի կազմի, որովհետև սովոր էին եվրոպական հարևանության շրջանակներում տեսնել 10-20 էջանոց փաստաթուղթ, բայց այս 400 էջերի վրա հեքիաթ չէ, որ գրված է, հռչակագրային ձևակերպումներ չեն, որ արված են»,- ասաց Ստեփան Սաֆարյանը:
Ըստ նրա՝ համաձայնագրում վերին աստիճանի կարևոր է այն հանգամանքը, որ այն բավական մեծ դիապազոն է ստեղծում Հայստանի և Եվրամիության միջև արտաքին ու անվտանգության հարցերում երկխոսության ծավալման համար:
«Չկա մի ոլորտ, ներքին բարեփոխումների ոլորտ ևս, որտեղ Հայաստանի ու Եվրամիության դիրքորոշումները, հանձնառությունները, փոխադարձ պարտավորությունները, ամրացված, թարմացված չլինեն: Բայց սա չի նշանակում, որ փաստաթուղթը կարող փրկել Հայաստանին հետընթացից որևէ ոլորտում: Այն պարզապես, առնվազն, լինելու է բռնելու տեղ հասարակության, քաղաքացիական հասարակության համար՝ հիշեցնելու Հայաստանի իշխանություններին, ԵՄ-ին՝ սանձնած փոխադարձ պարտավորությունների մասին: Դա երբեք իդեալական չի աշխատել, բայց համաձայնեք, որ եթե մի բան այն չլինի, պետք է մեղադրենք մեզ»,- ասաց Ստեփան Սաֆարյանը:
Նա շեշտեց, որ հատկապես ապրիլյան պատերազմից, միջազգային հարթակներում ադրբեջանական նախաձեռնությունների բնույթը տեսնելուց հետո ոչ պակաս կարոր է դառնում, որ ԵՄ-ն ի դեմս իր անդամ 28 երկրների համաձայնեցնում է ղարաբաղյան քաղաքականությունը, որպեսզի թույլ չտրվի հետագայում խնդրի տեղափոխում այլ ատյաններ, տարբեր երկրների կողմից մանյովներ ու շեղումներ այլ երկրների կողմից:
«Պատահական չէ, որ Ադրբեջանը վերջին ճիգերն է գործադրում հռչակագրում դրանից տարբերվող ձևակերպումներ տալու: Հուսով եմ, որ Եվրոպայում հրաշալի հասկանում են, որ Ալիևին այս պահին գոնե պետք է ոչ թե քաղաքական մոտեցումների փոփոխություն, այլ տեղեկանք՝ պատերազմի գործողություններն արդարացնելու համար: Ես հուսով եմ, որ վաղը չի գրվի այնպիսի դրույթ հռչակագրում, որը Ալիևի կողմից կմեկնաբանվի որպես տարածքային ամբողջականության գերակայություն, որպես պատերազմի իրավունք տվող տեղեկանք»,- շեշտեց նա: