Հեռուստատեսության և ռադիոյի մասին օրենքի փոփոխությունները նպաստելու են դաշտի մոնոպոլացմանը. Մեսրոպ Մովսեսյան
«Ա1+» հեռուստաընկերության ղեկավար Մեսրոպ Մովսեսյանին «Հեռուստատեսության և ռադիոյի մասին նոր օրինագիծը չի զարմացնում: Նա Tert.am-ի հետ զրույցում նկատեց, որ Կառավարության՝ օրինագծում կատարված փոփոխությունները հիմք են դնելու դաշտի մոնոպոլացման համար:
«Այն ամեն ինչը, որ հիմա պատրաստվում է, այն ամենը, որ ցանկանում են փոփոխության ենթարկել, բերելու է միայն նրան, որ մոնոպոլիզացնեն հեռուստաընկերությունների վիճակը: Սա իսկապես շատ վատ բան է ու հետևանքը վատ է լինելու»,- ասաց նա:
Մեսրոպ Մովսեսյանը չհերքեց՝ ՀՀ-ում հեռուստաընկերությունների քանակը շատ է: Սակայն նա գտնում է, որ օրենքը մուրճ դարձնելու, օրենքով ճնշում գործադրելու փոխարեն պետք է ընդլայնել մրցակցային դաշտը: «Ա1+» հեռուստաընկերության ղեկավարի կարծիքով՝ օրենքի ուժի մեջ մտնելուց հետո ՀՀ քաղաքացիները շատ տգեղ երևույթի ականատես կլինեն:
«Հայաստանի Հանրապետությունում հեռուստաընկերությունների քանակը շատ է, սակայն սա չի նշանակում, որ հարկավոր է ուժային մեթոդներով, օրենքի ճնշումներով կրճատել, այլ մրցակցության դաշտը պետք է ընդլայնել, իսկ մեզ մոտ հակառակն է՝ իջեցնում են: Այս հակառակ գործընթացը բերելու է նրան, որ լինելու են սարսափելի խախտումներ, լինելու են ընդվզումներ, լինելու է ոչ թե մրցակցություն, այլ՝ թշնամություն»,- շարունակեց Մեսրոպ Մովսեսյանը:
Նա շեշտեց, որ վերջին տարիներին «Հեռուստատեսության և ռադիոյի մասին» օրենքի փոփոխություններն արդեն իսկ որոշ մարզային հեռուստաընկերությունների կարգավիճակն անորոշության մեջ են դրել: Մեսրոպ Մովսեսյան օրինակ բերեց «Լոռի» հեռուստաընկերությունը՝ նկատելով, որ այն այս պահին «օդից կախված» է մնացել:
«Փաստորեն՝ մի շարք մարզային հեռուստաընկերություններն օդից կախված են մնացել, քանի որ հստակություն չկա նրանց կարգավիճակի մասին: «Լոռի» հեռուստաընկերությունը, որը մինչև այսօր պարզ չէ՝ շարունակելո՞ւ է գործունեությունը, ի՞նչ կարգավիճակով է շարունակելու, շարունակելու դեպքում ի՞նչ պայմաններ են ստեղծվելու: Պարզ է, որ նրանք առանց այն էլ կտրված են մայրաքաղաքի ինֆորմացիայից, ընդհանրապես հանրապետության անցուդարձից, իսկ պատճառն այն է, որ ամեն բան կենտրոնացված է մայրաքաղաքում: Այսօր ինֆորմացիայի փոխանակում չկա, հույս դնել ինտերնետային էջերի վրա խնդիրն էլ ավելի աբսուրդի է հասնում: Մի խոսքով՝ լավ բան չի սպասվում»,- ընդգծեց նա:
Միևնույն ժամանակ Մեսրոպ Մովսեսյանն այս ամենի հիմքում քաղաքական ենթատեքստ է տեսնում: Նրա դիրքորոշումն այն է, որ իշխանությունը հեռուստաընկերությունների ոլորտում խաղաղ ու կառավարելի վիճակ է ցանկանում ստանալ:
«Նպատակն իշխանության հանգստությունն է, որ լինեն ղեկավարվող հեռուստաընկերություններ, ղեկավարվող լրագրողներ: Ցանկանում են, որ լինի մի կենտրոն, որն ամեն ինչ իր ձեռքում կպահի և կղեկավարվի»,- եզրափակեց «Ա1+» հեռուստաընկերության ղեկավար Մեսրոպ Մովսեսյանը:
Հիշեցնենք, որ «Հեռուստատեսության և ռադիոյի մասին » օրինագիծը նոր սահմանադրությանն է համապատասխանեցվում՝ կապված հանձնաժողովի և խորհրդի անդամների ընտրության հետ: Այժմ դա վերապահվում է Ազգային ժողովին, իսկ մյուս դեպքում՝ վարչապետի որոշմամբ հաստատված մրցութային կարգին:
Նշենք նաև, որ ոլորտի մասնագետների դժգոհություն այն է, որ նոր օրինագծում էլ պահպանվել են թվային հեռարձակման մասնավոր ցանցի (մուլտիպլեքս) ստեղծման համար առաջադրված պայմանները, ինչը, ըստ մասնագետների, չափազանց բարդ է և հսկայական ներդրումներ է պահանջում: Որպես հետևանք մասնավոր մուլտիպլեքս որևէ մեկը չի ցանկանում ստեղծել, արդեն երկու տարի է հայտարարված մրցույթին մասնակցող չկա, իսկ մարզերում գործող 10-ից ավելի տեղական հեռուստաընկերությունները դուրս են մնացել թվայնացման գործընթացից, շարունակում են գործել անալոգային ռեժիմով՝ կորցնելով լսարանն ու հայտնվելով փակման վտանգի առջև: