Կարծում եմ` ՀՀ-ԵՄ համաձայնագիր կստորագրվի հենց Բրյուսելում. Ալ. Իսկանդարյան
Կովկասի ինստիտուտի տնօրեն Ալեքսանդր Իսկանդարյանը, Tert.am-ի հետ զրույցում անդրադառնալով Հայաստան-Եվրամիության շրջանակային համաձայնագրի ստորագրման հնարավոր երկարաձգմանը, նշեց, որ դրա հավանականությունը մեծ չէ:
«Բուն գործընթացի վերաբերյալ այդպիսի հավանականություն կա, բայց կարծում եմ, որ այն շատ մեծ չէ: Ընդհանուր բոլոր կողմերը բանակցություններում արտահայտվել են և այն խնդիրները, որոնք կարիք ունեին կարգավորելու, կարծում եմ, որ դրանց լուծման հարցում կա հեռանկար, որ դրանք կկարգավորվեն»-ասաց նա:
Քաղաքագետը հիշեցրեց, որ Ռիգայի փաստաթղթի բանակցությունների օրինակը, երբ դրա շուրջ քննարկումները շարունակվում էին նույնիսկ վերջին գիշերը: «Ես վերլուծաբան եմ և պետք չէ երբեք ասել երբեք, ամեն բան պատահում է: Սակայն ասել, որ ընդհանրապես ոչինչ չի ստորագրվի, կարծում եմ, որ դրա հավանականությունը ընդհանարապես մինիմալ է: Ավելի շուտ կստորագրվի և ես կարծում հենց կստորագրվի Բրյուսելում»,-ասաց նա:
Ինչ վերաբերում է Ռուսաստանի կողմից խոչընդոտներ առաջացնելու հավանականությանը, ապա Ալեքսանդր Իսկանդարյանն ասաց, որ Ռուսաստանի հետ և ընդհանրապես բոլոր դիվանագիտական խնդիրներն այս համաձայնագրի շուրջ որոշված են վաղուց:
Հիշեցնենք, որ ՀՀ նախագահ Սերժ Սարգսյանն այսօր՝ նոյեմբերի 23-ին, աշխատանքային այցով կմեկնի Բելգիայի Թագավորություն՝ մասնակցելու Բրյուսելում նոյեմբերի 23-24-ը կայանալիք Եվրոպական ժողովրդական կուսակցության և ԵՄ Արևելյան գործընկերության գագաթնաժողովներին: