Տեղի ունեցավ Գրքի երևանյան առաջին փառատոնի և գրքի ցուցահանդես -վաճառքի պաշտոնական բացման արարողությունը
Հանրապետության Հրապարակի նախկին Կառավարական 2-րդ տանն այսօր տեղի ունեցավ Գրքի երևանյան առաջին փառատոնի և գրքի ցուցահանդես -վաճառքի պաշտոնական բացման արարողությունը:
Միջոցառման նախաձեռնողը «Միհր» ստեղծագործողների միությունն է, աջակիցը՝ մշակույթի նախարարությունը: Կազմակերպիչները հավաստում են՝ փառատոնի նպատակը հայ ժամանակակից գրականությունն ընթերցողին ավելի ճանաչելի և ընդունելի դարձնելն է, գրող-հրատարակիչ-ընթերցող շղթայի ամրացումը, նոր հրատարակությունների մասին տեղեկատվությունն առավել հասանելի դարձնելը:
«Ես շատ միջազգային նման փառատոնների եմ մասնակցել, և եթե համեմատեմ այս փառատոնը դրանց հետ, պետք է նկատեմ՝ մենք դեռ շատ զարգանալու տեղ ունենք, աշխատելու, ծավալվելու տեղ ունենք: Բայց Հայաստանում մենք այսպիսին չենք ունեցել, այս մասշտաբի, այս ընդգրկմամբ, մեր հրատարակիչների, գրողների մասնակցությամբ նման ցուցահանդես Հայաստանում չենք ունեցել»,- ասաց Մշակույթի փոխնախարար Ներսես Տեր-Վարդանյանը:
Նշենք, որ փառատոնը տևելու է նոյեմբերի 24-26-ը: Այս 3 օրերի ընթացքում ընթերցասերները հնարավորություն կունենան մասնակցել մի շարք միջոցառումների` ցուցահանդես, վարպետության դասընթացներ, ընթերցանություն և անտիպ գործերի մրցույթ:
Վերջինի մասին խոսելիս Ներսես Տեր-Վարդանյանը նշեց, որ չորս գրական ուղղություններով է լինելու՝ արձակ, պոեզիա, դրամատուրգիա, մանկապատանեկան գրականություն:
«Հաղթող գրողների ստեղծագործությունների հրատարակչության համար պետությունը օժանդակություն է նախատեսում, ընդ որում, գրողներն իրենք են որոշելու, թե որ հրատարակչությունն են ընտրելու: Մենք հնարավորություն ենք տալիս գրողներին իրենց ճանապարհը հարթելու, գտնելու իրենց հանրահռչակողին, իրենց՝ շուկայում ներկայացնողին»,- ասաց նա՝ հավելելով, որ գրողների և ժյուրիի հանձնաժողովի կազմը առայժմ հայտնի չէ, նրանց մասին կիմացվի փառատոնի փակման օրը՝ մրցույթի արդյունքները ամփոփելու ժամանակ:
Գրականագետ Արքմենիկ Նիկողոսյանը, որը փառատոնի ընթացքում վարպետության դասեր է անցկացնելու գրող-հրատարակիչ հարաբերությունների մասին, Tert.am–ի հետ զրույցում խոսելով փառատոնի նպատակի մասին՝ նշեց, որ իրականում այն գրողներին շատ բան է տալու:
«Թող գան, տեսնեն, թե ինչպիսի գրքեր են գրվում, որովհետև բոլորս փակված ենք մեր անկյուններում, սենյակներում, մտածում ենք, որ Հայաստանում ոչինչ չի կատարվում,- ասաց նա՝ նկատելով, որ փառատոնը հարթակ է հրատարակիչների և գրողների համար դաշտը ուսումնասիրելու և աշխատանքները համեմատելու համար: