ՀՀ-ԵՄ նոր համաձայնագրի ստորագրմամբ Հայաստանի միջազգային վարկն էապես բարձրացել է. Դավիթ Շահնազարյան
Հայաստանի և Եվրամիության միջև երեկ Բրյուսելում ստորագրված ընդլայնված գործընկերության մասին փաստաթուղթն առանց չափազանցության պատմական էր: Tert.am-ի հետ զրույցում ասաց Հայաստանի առաջին նախագահի հատուկ հանձնարարությունների գծով դեսպան, Տարածաշրջանային հետազոտությունների կենտրոնի առաջատար վերլուծաբան Դավիթ Շահնազարյանը:
Նա նշեց, որ համաձայնագիրն էապես մեծացնում է Հայաստանի Հանրապետության միջազգային հեղինակությունը, նպաստում է Հայաստանի և Արցախի անվտանգությանը:
«Ես չէի փորձի սա հակադրել Հայաստան-Ռուսաստան հարաբերություններին: Հայաստանն ունի պարտավորություններ, որոնք ստանձնել է Եվրասիական տնտեսական միության և ՀԱՊԿ-ի շրջանակներում, բայց պետք չէ հակադրել այն Եվրամիության հետ համագործակցությանը: Ունենալով Եվրամիության անդամ-պետությունների հետ բարձր մակարդակի հարաբերություններ կառուցելու հեռանկար, մենք նաև փաստաթղթի ստորագրման արդյունքում էապես կբալանսավորենք Հայաստանի արտաքին քաղաքականությունը»,– ասաց նա:
Կարևոր է, որ Հայաստանի միջազգային վարկը էապես բարձրացել է, կարևոր է, որ այն նպաստում է Հայաստանի և Արցախի անվտանգության ապահովման մակարդակի բարձրացմանը: Միջազգայնորեն ճանաչվում են Լեռնային Ղարաբաղի հակամարտության կարգավորման այն սկզբունքները, որոնք հետապնդում են Հայաստանը, Ղարաբաղը, միջազգային հանրությունը: Միայն Ադրբեջանն է, որ այլ տեսակետ ունի: Ադրբեջանը շատ լուրջ խնդիրներ է ունենալու Եվրոպայի հետ հարաբերվելիս, որովհետև ԵՄ-ն հստակ ամրագրեց իր դիրքորոշումն այն հարցում, թե ինչպես պետք է կարգավորվի ղարաբաղյան հակամարտությունը»,- ասաց Դավիթ Շահնազարյանը:
Նա շեշտեց, որ համաձայնագրի ստորագրման առիթով միմյանց տրված շնորհավորանքներից բացի, Հայաստանն առաջիկայում մեծ անելիքներ ունի. «Պետք է հստակ աշխատել, որ Եվրամիության անդամ բոլոր պետությունները վավերացնեն համաձայնագիրը: Բացի այդ, պետք է ջանքերն ուղել ստանձնած պարտավորությունները քայլ առ քայլ կատարելու ուղղությամբ: Սա շատ կարևոր գործընթացի սկիզբ է»:
Դավիթ Շահնազարյանի խոսքով՝ փաստաթուղթը հնարավորություններ է տալիս Արևելյան գործընկերության երկրների, հատկապես՝ Վրաստանի և Ուկրաինայի հետ, երկկողմանի հարաբերություններ զարգացնել՝ ունենալով դրա համար նոր հիմք: «Խոսքս, մասնավորապես Ուկրաինայի մասին է, որի հետ Հայաստանի հարաբերությունները պարզ չեն»,- պարզաբանեց Շահնազարյանը:
Հարցին՝ արդյոք Հայաստանի իշխանությունները կդրսևորեն այդ կամքը՝ իրականացնել փաստաթղթում ամրագրված բարեփոխումները, Դավիթ Շահնազարյանը պատասխանեց. «Եկեք հասկանանք, որ դա շատ բարդ խնդիր է: Հայաստանի իշխանությունները ստանձնել են այդ պարտավորությունը և առաջին հերթին քաղաքացիական հասարակությունը պետք է հետևի, որ այդ պարտավորությունները կատարվեն»: