Հավանական է, որ Կասպրշիկի գրասենյակն ընդլայնվի, սակայն այլ խնդիր է՝ թո՞ւյլ են տալու այդ մարդկանց աշխատել, թե՝ ոչ․ Դավիթ Բաբայան
Արցախի Հանրապետության նախագահի մամուլի խոսնակ Դավիթ Բաբայանի խոսքով՝ միջազգային հանրության մոտեցումներում արմատական փոփոխություններ նկատելի չեն: Նա Tert.am-ի հետ զրույցում նշեց, սակայն, որ կա միտում բոլորի մոտ՝ հասկանալու, որ այլևս չի կարելի թույլ տալ վերադարձն անցյալին:
«Դա, կարծում եմ, նաև օբյեկտիվ իրականության արտացոլանք է, որովհետև ի վերջո, Արցախը կայացած ժողովրդավարական պետություն է: Այն, որ իր բոլոր խնդիրներով հանդերձ, Արցախը, որպես պետական կազմավորում, կայացել է, և որևէ վտանգ միջազգային հանրության համար չի ներկայացնում, միանշանակ է»,- ասաց նա:
Նրա խոսքով՝ բոլոր այն անիրատեսական մոտեցումները, որոնք Ադրբեջանը ցուցաբերում է, ինչպիսիք են՝ վերադարձն անցյալին, Արցախի նկատմամբ հավակնություններ ցուցաբերելը, արդեն իսկ լուրջ չի ընկալվում միջազգային հանրության կողմից:
Անդրադառնալով ՀՀ արտգործնախարար Էդվարդ Նալբանդյանի՝ Վիեննայում բերած ինը պատճառներին, որոնք խոչընդոտում են ԼՂ հիմնախնդրի կարգավորմանը, նշեց, որ դրանք հիմնականներն էին, չնայած կարելի էր դեռ այդ շարքը լրացնել:
«Առաջինը դա Ադրբեջան պետության արհեստածին լինելն է, աշխարհաքաղաքական իրադրությունից ելնելով դրա ստեղծումը, դրա բազմազգ լինելն է, կլանային բռնապետական համակարգի առկայությունը: Այս ամենն են խոչընդոտում ղարաբաղյան հիմնախնդրի կարգավորմանը»,- ասաց նա՝ նշելով, որ այս համատեքստում պետք է նաև պարզել Ադրբեջանի ժողովրդի ինքնությունը, ովքեր են նրանք, որն է նրանց տեսլականը և ինչ են ցանկանում անել:
Նա նշեց, որ միջազգային հանրությունն էլ է նկատում Ադրբեջանում կատարվողը և Ադրբեջանի քաղաքականությունը: «Ադրբեջանի բազմազգ լինելը անկանխատեսելի է դարձնում ցանկացած ռազմական գործողություն, որովհետև եթե Ադրբեջանը նորից արկածախնդրության դիմեց, ապա առաջին իսկ պարտությունից հետո այնտեղ կսկսվեն ազգային ազատագրական շարժումներ: Ադրբեջանում մեծ թվով թալիշներ են ապրում՝ իրանական ժողովուրդ, նրանք նաև ապրում են Ադրբեջանին սահմանակից տարածքներում, նրանք անտարբեր չեն մնա իրենց ազգակիցների ճակատագրի նկատմամբ: Նույն իրավիճակը կստեղծվի նաև լեզգիների դեպքում և այլն: Հիմա պատկերացրեք, որ եթե այս ամենը պայթի, կամա թե ակամա Ռուսաստանը, Թուրքիան, Իրանը, Վրաստանը կներգրավվեն, և դա մի ահավոր բան կդառնա, կդառնա երրորդ համաշխահարհային պատերազմի դրդապատճառ: Բոլորն էլ հասկանում, որ կստեղծվի մի անկառավարելի իրավիճակը՝ եթե հաշվի էլ ենք առնում, թե ինչ է կատարվում Սիրիայում, Իրաքում Պաղեստինում և այլն:
Դավիթ Բաբայանը նկատեց՝դժվար է ասելը,թե որքան ժամանակ է պետք Ադրբեջանին՝ իր մոտեցումները վերանայելու համար․«Բայց հիմա ամենակարևորը խաղաղության պահպանումն է, որպեսզի բնականոն գործընթացների արդյունքում աշխարհընկալման մոտեցումների փոփոխություն լինի Ադրբեջանում»:
Անդրադառնալով ԵԱՀԿ Մինսկի խմբի համանախագահող երկրների պատվիրակությունների ղեկավարների հայտարարություններին և կոչերին՝ վերադառնալ նախկինում արված պայմանավորվածությունների կատարմանը, ընդունել ԵԱՀԿ գործող նախագահի անձնական ներկայացուցչի գոյություն ունեցող գրասենյակի ընդլայնումը և այլն, Դավիթ Բաբայանը նշեց․ «Դա քաղաքական առումով ամենաանշահարկելի ուղղությունն է: Դա զուտ մարդասիրական, ռազմատեխնիկական է, այդ կոչերի իրականացմամբ մարդկանց կյանք է պարզապես փրկվելու: Այդպես ո՛չ Արցախն է ճանաչվելու, ո՛չ էլ տարածքների զիջում է լինելու: Սա ամենաանշահարկելի քաղաքականություն է, բայց նույնիսկ սա դժվար է իրագործվում: Բայց այլընտրանք էլ չկա․ կա պայմանավորվածություն, և այդ հարթությունից էլ պետք է սկսել գործընթացը: Բացի վստահության մեխանիզմների ներդրումը, կան նաև այլ խնդիրներ, որոնք հետագայում կարող են իրագործվել»:
Արցախի նախագահի մամուլի խոսնակը նկատեց, որ հավանական է, որ Կասպրշիկի գրասենյակն ընդլայնվի, սակայն այլ խնդիր է՝ թո՞ւյլ են տալու այդ մարդկանց աշխատել, թե՞՝ ոչ:
«Աստիճանաբար պետք է էջեր թերթել, առաջ գնալ: Բայց ամեն մի առաջ գնալու համար Ադրբեջանը կրկին խոչընդոտելու է: Ավելի քան համոզված եմ, որ եթե անգամ Կասպրշիկի գրասենյակի դիտորդների թիվն ավելանա, այնպես են անելու, որ նրանք չկարողանան աշխատել: Բայց դա կապ չունի, պետք է առաջ անցնել հենց այս ուղղությամբ»,- ասաց նա: