Ես պատրանքներ չունեմ, որ ամենաաղքատ Շիրակի մարզում միանգամից ամեն բան կփոխվի, բայց դրական քայլեր կան. Արման Սահակյան (տեսանյութ)

Ես իլյուզիա չունեմ, որ միանգամից ամեն բան կփոխվի, բայց որոշակի աշխատանքից հետո հետ ընկնելու տեմպը, մանավանդ Երևանի համեմատ, կսկսի կրճատվել: Tert.am-ի հետ զրույցում նման տեսակետ հայտեց Շիրակի մարզից ընտրված, ԱԺ «Հայաստանի Հանրապետական կուսակցություն» խմբակցության պատգամավոր Արման Սահակյանը՝ անդրադառնալով Շիրակի մարզի՝ ամենաաղքատ մարզը լինելու հանգամանքին: Սակայն նա լավատես է և հույս ունի, որ գալիք տարի խնդիրները կկրճատվեն և ոլորտային զարգացում կլինի:

- Պարո՛ն Սահակյան, ԱՎԾ-ն հրապարակեց ՀՀ-ում աղքատության ցուցանիշը, ըստ որի՝ ՀՀ-ում 29.4 տոկոս աղքատություն կա, և ՀՀ ամենաաղքատ մարզը Շիրակի մարզն է: Ինչո՞ւ տարիներ շարունակ այս ցուցանիշը չի փոխվում:

- Ցավոք սրտի, առաջին անգամ չէ ցուցանիշն այսպիսին, ինչպես նաև փոփոխության տեմպը բավարար չէ: Օբյեկտիվ ու սուբյեկտիվ պատճառներով Հայաստանում Գյումրին ամենավատ վիճակում է սոցիալական պայմանների տեսանկյունից: Միևնույն ժամանակ, ազնիվ լինելու համար պետք է ասեմ, որ վերջին ժամանակաշրջանում դրական քայլեր կան, ու հուսով ենք, որ տարբերությունը հետագայում կկրճատվի: Ես իլյուզիա չունեմ, որ շատ արագ կկրճատվի, միանգամից ամեն բան կփոխվի, բայց որոշակի աշխատանքից հետո հետ ընկնելու տեմպը, մանավանդ Երևանի համեմատ, կսկսի կրճատվել:

- Ինչպե՞ս կարող է կրճատվել՝ հաշի առնելով նաև արտագաղթի տեմպերը, հնարավո՞ր է, որ մինչ կրճատումն արդեն ուշ լինի:

- Ուշի և ոչ ուշի չափանիշը դժվար է գնահատել, քանի որ արդեն իսկ ուշ է: Երեկ երկրաշարժի 29-րդ տարին էր, իսկ մարդիկ դեռ տնակներում են ապրում, ցավոք սրտի, վիճակը շատ վատ է: Իմ կարծիքով՝ Գյումրիի ավագանին օրերս արդար հարց էր բարձրացնում, այն է, որ Գյումրիում մանկապարտեզ երեխաները հաճախում են վարձավճարով, իսկ Երևանում անվճար է: Սա իսկապես խորը անարդարություն է, հիմա մարդկանց որքան էլ ասես, որ օրենքով այդպես է, պարզապես Երևանի քաղաքապետարանն իր բյուջեից է տալիս, միևնույն է՝ ՀՀ քաղաքացիներ են հաճախում մանկապարտեզ, և ի՞նչ կապ ունի, թե որտեղ են ապրում:

- Ըստ Ձեզ՝ իշխանությունը կարողանո՞ւմ է ի կատար ածել մարզերի համաչափ զարգացման խոստումը, քանի որ տպավորություն է՝ ամեն ինչ կենտրոնանում է միայն Երևանում:

- Ցավոք սրտի, այդպես է, միայն Երևանում ապրող մարդիկ այդ սարսափելի տարբերությունը չեն զգում, քանի որ, իրականում, Երևանում ու մարզերում տարբերությունը սարսափելի է: Պետությունն այստեղ խնդիրներ ունի լուծելու, որը, ցավոք սրտի, լավ տեմպերով չի լուծվում: Բայց, որպեսզի արդար լինեմ, ասեմ, որ Գյումրիի օդանավակայանի վերագործարկումը, եկող տարի Երևան-Գյումրի գնացքի վերագործարկումը, որը կկրճատի տեղափոխման ժամկետը, որոշակի ակտիվություն կբերի քաղաք: Նաև շատ կարևորում եմ վարչապետի՝ Կումայրի նախաձեռնությունը, ամեն դեպքում շինարարությունը, հետաքրքրվածությունը, տուրիզմի որոշակի զարգացումը լավ ազդեցություն կթողնի:

- Խոսում ենք աղքատության հաղթահարման մասին, սակայն զուգահեռ տեսնում ենք, որ 2018թ. պետական բյուջեով սոցիալական ոլորտի ֆինանսավորումը չի ավելացել, ավելին՝ որոշակի կրճատումներ են եղել: Սա նոր խնդիրներ չի՞ առաջացնելու:

- Ես բյուջեի մասնագետ չեմ, դժվարանում եմ այս հարցին պատասխանել, բայց, ամեն դեպքում, կարծում եմ, որ այս տարի տնտեսության համար բավական լավ տարի է, բոլոր նախադրյալները կան, որ մյուս տարի էլ լավ կլինի: Իհարկե, լավ ասելով նկատի ունեմ, որ համեմատական կարգով լավ կլինի, մասնավորապես հույս ունեմ, որ արտահանումն աճելու է, տուրիզմն էլ կզարգանա:

- Իշխանության տեսակետն այն է, որ աղքատության հաղթահարման ամենալավ մեխանիզմներից մեկը տնտեսական աճն է: Արդյո՞ք 2018թ. կունենանք այն տնտեսական աճը, որ աղքատության մակարդակում շեշտակի փոփոխություն լինի:

- Հնարավոր է՝ հիմա ասածս սխալ հասկացվի, բայց անկախ նրանից, որ շատ կարևոր է հաղթահարել աղքատությունը, միևնույն է, եթե մարդիկ զգան, որ ինչ-որ բանով կարողանում են զբաղվել, գոնե հույս առաջանա, որ որոշակի ոլորտներ զարգանում են, ապա դա մեծ փոփոխությունների կբերի: Իմ կարծիքով՝ այս տարի նման հույս կա, հուսով եմ՝ մյուս տարի էլ տուրիզմի ու արտահանման ոլորտներում աճ կլինի, եթե համաշխարհային կատակլիզմներ չլինեն:


Մանրամասները՝ տեսանյութում: