Փաստաբան Գայանե Գալոյանին չեն տեղափոխել հիվանդանոց, պարզապես բավարարվել է բժշկական փորձաքննություն նշանակելու միջնորդությունը. պաշտպան
Հատուկ քննչական ծառայությունում քննվող կաշառքի վերաբերյալ քրեական գործի շրջանակներում կալանավորված փաստաբան Գայանե Գալոյանը առողջական լուրջ խնդիրներ ունի, բայց քաղաքացիական հիվանդանոց դեռ չի տեղափոխվել:
Բացի այդ, չնայած բժշկական փորձաքննություն նշանակելու միջնորդությունը բավարարվել է, սակայն Հատուկ քննչական ծառայության քննիչը նախաքննությունն ավարտել ու գործն ուղարկել է դատարան:
Այս մասին Tert.am-ի հետ զրույցում ասաց Գայանե Գալոյանի փաստաբաններից Վլադիմիր Գրիգորյանը:
«Տեղեկությունը, որ նրան տեղափոխել են քաղաքացիական հիվանդանոց դեռ ճիշտ չէ: Պարզապես ասեմ, որ բազմաթիվ միջնորդություններն այն մասին, որ անհրաժեշտ է միջգերատեսչական դատաբժշկական հանձնաժողովի միջոցով նշանակել նոր դատաբժշկական փորձաքննություն, բավարարվեց: Դրա հետ համաձայնեց և՛ Գլխավոր դատախազությունը, և՛ Հատուկ քննչական ծառայությունը: Տվյալ փորձաքննությունը նշանակվել է, առաջադրվել են հարցեր իմ կողմից, պաշտպանական կողմից»,-ասաց Գրիգորյանը:
Պաշտպանը հայտնեց, ոչ միջգերատեսչական հանձնաժողովը պաշտպանների մասնակցությամբ հանդիպել է Գալոյանի հետ և զուտ անամնեստիկ տվյալներ է վերցվել նրանից: Գրիգորյանի խոսքով՝ նրան կտեղափոխեն որևէ բուժհաստատություն, որպեսզի կլինիկական ապարատային և այլ հետազոտություններով, ներգրավված առաջատար մասնագետների ուժերով պարզեն կալանավորի ներկայիս վիճակը և հասկանան, թե նրա առողջական վիճակը համատեղելի է քրեակատարողական հիմնարկի պայմանների հետ, թե ոչ:
«Գայանե Գալոյանը հիվանդությունների մի ամբողջ փունջ ունի՝ բրոնխիալ ասթմա, շաքարային դիաբետ, հիպերտոնիայով է տառապում, շաքարախտով պայմանավորված` ուղեղի արյունատար անոթները ախտահարվում են: Հիմա հանձնաժողովը պետք է դիմի քրեակատարողական հիմնարկ, որ նրան տեղափոխեն հիվանդանոց»,-ասաց փաստաբանը:
Սակայն, նրա խոսքով՝ անհեթեթ իրավիճակ է ստեղծվել՝ առանց բժշկական հանձնաժողովի եզրակացությունը ստանալու Հատուկ քննչական ծառայությունը մեղադրական եզրակացությամբ գործն ավարտել և ուղարկել է դատախազություն, որտեղից էլ գործը կուղարկվի դատարան. «Իմ պրակտիկ կյանքում նման բան չեմ տեսել: Հիմա Գայանե Գալոյանի հանձնաժողովի հետ քննիչը պետք է աշխատեր, սակայն տոնական օրերին, մինչև հետազոտեն, եզրակացություն տան, փաստորեն, Գալոյանը կմնա կալանքի տակ մինչև նշանակվի առաջին նիստը»:
Հիշեցնենք, որ փաստաբան Գայանե Գալոյանին մեղադրանք է առաջադրվել Քրեական օրենսգրքի 38-311-րդ հոդվածի 4-րդ մասի 2-րդ կետով: