Նոր հակակոռուպցիոն հավակնոտ ռազմավարության համար նոր միջոցներ են պետք, նոր մոնիթորինգ. վարչապետ (տեսանյութ)
Վարչապետ Կարեն Կարապետյանի՝ կառավարության այսօրվա նիստի հանձնարարականներից մեկը վերաբերում էր հակակոռուպցիոն գործող ռազմավարության արդյունավետության ու նոր ռազմավարությանը: Վարչապետը հիշեցրեց, որ 2015 թ. ընդունվել է Հայաստանի հակակոռուպցիոն ռազմավարությունը, իրականացվել են մի շարք միջոցառումներ այս ընթացքում կոռուպցիայի դեմ պայքարի շրջանակներում, ռազմավարությունից բխող որոշ միջոցառումներ դեռևս ընթացքի մեջ են:
«Բայց նոր՝ հավակնոտ ռազմավարության համար, նոր միջոցներ են պետք, նոր մոնիթորինգ»,-ասաց նա:
Նա հանձնարարեց հանրապետական գործադիր մարմինների ղեկավարներին սահմանված ժամկետում ավարտին հասցնել գործող ռազմավարությունից բխող անհրաժեշտ օրենսդրական աշխատանքները, 30 օրվա մեջ մշակել ըստ ոլորտների նոր առաջարկություններ ու ներկայացնել Արդարադատության նախարարությանը:
Կառավարության աշխատակազմի ղեկավարին վարչապետը հանձնարարեց ավարտին հասցնել ներկայիս ռազմավարության աշխատանքները 15 օրվա մեջ, ամփոփել միջոցառումներն ու արդյունքները ներկայացնել ամփոփ տեղեկատվությամբ, իսկ Արդարադատության նախարարությունը պիտի ձեռնարկի միջոցներ նոր և հավակնոտ ռազմավարության մշակման ուղղությամբ՝ ներգրավելով քաղաքացիական հասարակության ներկայացուցիչներին, գործարարներին, գիտնականներին և այլ շահագրգիռ կողմերին: