Գագիկ Ծառուկյանը բազմիցս հայտարարել է՝ վարչապետ առաջադրելը մեծամասնության իրավասությունն է. պատգամավոր (տեսանյութ)
«Ծառուկյան» խմբակցությունը դեռ չի քննարկել 2018թ.-ի վարչապետ ներկայացնել-չներկայացնելու հարցը: Այս մասին Tert.am-ի հետ զրույցում ասաց ԱԺ «Ծառուկյան» խմբակցության պատգամավոր Վարդևան Գրիգորյանը:
«Մենք ընդհանրապես հարցը չենք քննարկել: Եթե քննարկվի, դրա մասին ձեզ կտեղեկացնենք»,- ասաց նա:
Հարցին՝ հակված են ունենա՞լ, թե չունենալ վարչապետի սեփական թեկնածու, Գրիգորյանը նորից պատասխանեց, որ հարցը չի քննարկվել, ապա նշեց. «Մենք բազմիցս ենք ասել, որ դա քաղաքական մեծամասնության իրավունքն է: Խոսքը ՀՀԿ և ՀՅԴ մասին է, ավելի շատ նրանց իրավունքն է առաջադրել թեկնածու: Մենք դեռ չենք քննարկել հարցը»:
Հարցին՝ ի՞նչ նկատի ունեն՝ ասելով, որ թեկնածու առաջադրելը ավելի շատ մեծամասնության իրավունքն է, սա նշանակում է, որ իրենք չե՞ն առաջադրելու վարչապետի թեկնածու, Գրիգորյանը կրկնեց, որ հարցը չի քննարկվել, պարզապես բազմիցս՝ ի դեմս խմբակցության ղեկավար Գագիկ Ծառուկյանի, հայտարարվել է, որ դա մեծամասնության իրավասությունն է:
Այն հարցին, թե ունե՞ն արժանի թեկնածուներ, ովքեր կարող են վարչապետի պաշտոնի համար առաջադրվել, պատգամավորը պատասխանեց, որ անփոխարինելի մարդիկ չկան, ինքը կարող էր իր կարծիքը հայտնել, բայց ճիշտ է, որ այդ մասին խոսվի խմբակցությունում քննարկումներից հետո:
«Ելք»-ը երեկ հայտարարել էր, որ չի բացառվում, որ վարչապետի թեկնածու առաջադրեն: Հարցին՝ հնարավոր համարո՞ւմ եք սատարել նրանց թեկնածուին կամ ՀՀԿ թեկնածուին, Գրիգորյանը նորից ասաց, որ հարցը չի քննարկվել:
Մանրամասները՝ տեսանյութում: