Միսս Իրաքի ընտանիքը ստիպված է եղել հեռանալ երկրից՝ Միսս Իսրայելի հետ նրա լուսանկարի պատճառով
«Միսս տիեզերք» գեղեցկության մրցույթում Իրաքի ներկայացուցչի ընտանիքը հեռացել է երկրից՝ մահվան սպառնալիքներ ստանալով:
Այս մասին հայտնում է The Jerusalem Post-ը՝ նշելով, որ սպառնալիքների պատճառն իրենց դստեր ելույթն է բիկինիով և սոցցանցում հրապարակված լուսանկարը Իսրայելի մասնակցուհու հետ միասին:
Միսս Իրաք տիտղոսին արժանացած Սառա Իդանը բնակվում է Միացյալ Նահանգներում, իսկ ընտանիքի մյուս անդամները վերջերս են հեռացել երկրից: Այս մասին հայտնել է Միսս Իսրայել Ադար Գենդելսմանը՝ նշելով, որ Իրաքի ներկայացուցչի հետ ծանոթացել է մեկ ամիս առաջ Տոկիոյում անցկացված մրցույթի ժամանակ, և իրենք հատուկ հարաբերություններ ունեն:
Մրցույթի օրերին նրանք լուսանկար են հրապարակել Instagram-ում՝ «Խաղաղություն և սեր Միսս Իրաքից և Միսս Իսրայելից» կից գրությամբ: