Գերթանկարժեք բիոզուգարանների ճակատագիրն անհայտ է, բայց միանշանակ այնտեղ եղել են կոռուպցիոն չարաշահումներ. Ա.Նավասարդյան
Հայաստանը տուրիստական երկիր համարելու և զբոսաշրջիկների համար գրավիչ դարձնելու գործում, օրինակ, հանրային զուգարանների բացակայությունը իրապես խնդիր է, բայց լուծելի, Tert.am-ի հետ զրույցում ասաց «Գելափ ինթերնեյշնլ» կազմակերպության հայաստանյան գրասենյակի ղեկավար Արամ Նավասարդյանը:
Հանրային զուգարանների բացակայությունը «Գելափի»՝ տարբեր տարիներին արված հարցումներում ՝ինչից են գոհ կամ դժգոհ հարցադրումներով, եղել է դժգոհությունների շարքում, տեղեկացրեց Արամ Նավասարդյանը:
«Ընդ որում այդ խնդիրը ոչ միայն տուրիստների համար է կարևոր, այլև մեր քաղաքացիների համար: Դա հասարակ մի խնդիր է, որը բարդ չի իրականացնել, պետք է ուղղակի ճիշտ կազմակերպել: Խնդիրը ոչ միայն Երևան քաղաքում է արդի, այլև մարզային բոլոր քաղաքներում, որտեղ մենք խթանում ենք և գովազդում ենք, որպեսզի ներգրավենք մեծ թվով տուրիստների»,-ասաց Նավասարդյանը:
Tert.am-ի դիտարկմանը, թե թանկարժեք բիոզուգարանների ճակատագրից տեղեկություններ կա՞ն, Արամ Նավասարդյանն ասաց, որ տեղեկատվության չի տիրապետում, բայց միանշանակ կարծում է, որ այնտեղ կան կոռուպցիոն չարաշահումներ:
«Բիոզուգարանների մասին տեղեկատվություն չունեմ, լավ կլինի հարցնել կառավարությանը, նախկին վարչապետ Տիգրան Սարգսյանին, որը այս հանճարեղ որոշումը կայացրել է, մինչև հիմա դրա պատասխանը, ըստ երևույթին, ոչ մեկ չի տվել: Կարծում եմ պետք է հետամուտ լինել և այդ անիմաստ ու անհիմն ակտի վերաբերյալ իշխանավորները, որոնք հաշվետու էին այդ ժամանակահատվածում, պետք է կարողանան պատասխան տալ: Ես իհարկե փաստեր չունեմ, որ ապացուցեմ, բայց կարծում եմ, որ այդտեղ կոռուպցիոն չարաշահումներ են եղել»,-ասաց Նավասարդյանը:
Նավասարդյանը բիոզուգարանների գնումն անիմաստ ծախս է որակում, ինչից կոնկրետ պաշտոնյաներ, նրա խոսքով, կոնկրետ օգուտներ են ստացել:
«Դրա համար կան պատկան մարմիններ, քննչական մարմին, որ կոնկրետ պետք է հետամուտ լինի խնդրին, որպեսզի հետայսու տարբեր տրամաչափի չինովնիկներ և անձինք բավականին երկար մտածեն այդպիսի անիմաստ ծախսեր անելիս։ Չնայած չեմ կարծում, որ դա անիմաստ ծախս էր նրանց համար, ովքեր այդ որոշումը կայացրել են, իրենք բավականին օգուտներ են շահել այդ ընթացքում, բայց դրա դեմ պետք է առնել»,-ասաց Նավասարդյանը:
Հիշեցնենք, որ դեռևս 2013 թվականին ՀՀ վերահսկիչ պալատը հրապարակեց 2012թ. ստուգումների արդյունքները, այնտեղ նաև անդրադարձ կար գերթանկարժեք բիոզուգարաններին: Վերահսկիչ պալատն Էկոնոմիկայի նախարարությունում որոշ ծրագրերի ստուգման արդյունքում եզրակացրել էր, որ բիոզուգարանների վրա կատարված ծախսն անիմաստ էր, հատկապես, որ զուգարանները երբևէ չեն գործել: Ըստ ՎՊ-ի՝ 100 մլն դրամի անարդյունավետ ծախս է եղել: