Այդքան ոչ աշխատանքային օր ունենալը Հայաստանի համար ճոխություն է. Միքայել Մելքումյանը՝ կողմ է հանգստյան օրերի կրճատմանը
ԱԺ փոխնախագահ, «Ծառուկյան» խմբակցության պատգամավոր Միքայել Մեքլումյանը կողմ է Ամանորի տոների հետ կապված ազատ օրերի կրճատմանը: Նա Tert.am-ի հետ զրույցում նշեց, թե դա ոչ թե կրճատում է, այլ նորմալ երևույթ է, որը գործել է նախկինում: Միքայել Մելքումյանը գտնում է, որ հայաստանյան տնտեսության պայմաններում 10-15 օր հանգստանալը շռայլություն է:
«Նախկինում մինչև հունվարի 3-ն էր հանգստյան օրերը, իսկ մնացած օրերն աշխատանքային էին, քանի որ մենք ո՛չ այդքան շռայլության իրավունք ունենք մեզ թույլ տալու, ո՛չ էլ դրա անհրաժեշտությունը կա: Այսինքն՝ բոլոր դեպքերում դրա պատճառով տարբեր ոլորտներ թմրած վիճակում են, առանց այն էլ հունվարը միշտ համարվել է ծանր ամիս՝ և ՛ առևտրի , և տարբեր հաստատությունների համար: Մեզ պետք է աշխատել, սակայն դրա համար էլ պետք է, որ ենթակառուցվածքներն աշխատեն, բանկերը, հարկային, մաքսային ծառայություններն աշխատեն, այսինքն՝ նորմալ լոգիստիկ համակարգերը, չէ՞ որ բիզնեսն էլ դանդաղում այս ամենի հետևանքով»,- ասաց Մելքումյանը:
Պատգամավորը շեշտեց՝ հանգստյան օրերը կրճատելով Հայաստանն Ամերիկա կամ հեծանիվ չի հայտնաբերում, քանի որ ՀՀ սոցիալ-տնտեսական պայմաններում այդքան ոչ աշխատանքային օր ունենալը չթույլատրված ճոխություն է: Միևնույն ժամանակ պատգամավորը նշեց, թե նախաձեռնության հետ կապված թյուրըմբռնում կա և շեշտեց, որ աշխատանքային օրերերի կրճատումը միայն Կառավարությանը չի վերաբերում:
«Սա կառավարության համար չեմ ասում, դա լինում է նրա համար, որ մեր պետությանն անհրաժեշտ է, որ մարդիկ ավելի շատ աշխատեն, իսկ Կառավարությունը, միևնույն է, իր աշխատավարձը ստանում է ազատ օրերին: Հարցն այն է, օրինակ՝ ընդունենք, որ մարդիկ ունեն փոքրիկ բիզնես, ձեռնարկություն, հիմա առանց այն էլ ծախսերը շատ է, վիճակը վատ է, հետո էլ հունվարի տոների համար ծախս են արել, հիմա ինչքան շատ աշխատեն, այդքան լավ: Երբ մարդիկ քիչ են աշխատում, եկամուտը քիչ է լինում ու բյուջեն է քիչ գումար է մնում, առանց այն էլ հունվարը պասիվ ամիս է»,- շարունակեց պատգամավորը:
Միքայել Մելքումյանի խոսքով՝ այդքան ազատ օր իր հետ շղթայական վնաս է բերում: Նա շեշտեց, որ տարվա մեջ կան նաև մի շարք տոներ, շաբաթ-կիրակիներ:
«Մեզ անհրաժեշտ է շուտ մտնել ռիթմի մեջ, քանի որ հունվարի 8-ը գալ աշխատանքի, դա դեռ չի նշանակում, որ հենց այդ օրվանից ռիթմի մեջ կարող ես մտնել՝ առնվազը 15-20 –ին նոր աշխուժանում է: Առանց այն էլ հունվարը կես օրակարգով է աշխատում»,- եզրափակեց ԱԺ փոխխոսնակը:
Նշենք, որ Կառավարության կքննարկի «Հայաստանի Հանրապետության տոների և հիշատակի օրերի մասին» ՀՀ օրենքում փոփոխություն կատարելու մասին» կառավարության աշխատակազմի ներկայացրած նախագիծը, որով առաջարկվում է տոնական ոչ աշխատանքային օրերի ցանկից հանել հունվարի 3-ը, 4-ն և 5-ը: